ശ്രീനഗർ: ജമ്മുകശ്മീർ പിഡിപി അദ്ധ്യക്ഷ മെഹബൂബ മുഫ്തിയുടെ മകൾ ഇൽത്തിജ മുഫ്തിയും സജീവ രാഷ്ട്രീയത്തിലേക്ക്. പാർട്ടി അദ്ധ്യക്ഷയുടെ, അതായത് സ്വന്തം മാതാവായ മെഹബൂബയുടെ മാദ്ധ്യമ ഉപദേഷ്ടാവായാണ് ഇൽത്തിജ നിയോഗിക്കപ്പെട്ടിരിക്കുന്നത്. 2019 മുതൽ മെഹബൂബയുടെ സാമൂഹ്യമാദ്ധ്യമ അക്കൗണ്ടികൾ കൈകാര്യം ചെയ്തിരുന്നത് ഇൽത്തിജയായിരുന്നു. പാർട്ടിയിലെ തലമുറ കൈമാറ്റത്തിന്റെ ഭാഗമായാണ് ഇൽത്തിജയെ സജീവ രാഷ്ട്രീയത്തിലേക്ക് പ്രവേശിച്ചിരിക്കുന്നത്.
ഇൽത്തിജ രാഹുൽ നടത്തിയ ജോഡോ യാത്രയിൽ പങ്കെടുത്തിരുന്നു. അന്ന് മുതൽ ഇൽത്തിജ സജീവ രാഷ്ട്രീയത്തിലേക്ക് ചുവടുവെക്കുന്നു എന്ന തരത്തിൽ റിപ്പോർട്ടുകൾ സജീവമായി. ഇതിന് പിന്നാലെയാണ് ഇപ്പോൾ ചുമതല നൽകി ഇൽത്തിജയെ പാർട്ടിയുടെ മുൻധാരയിലേക്ക് എത്തിച്ചിരിക്കുന്നത്.
കോൺഗ്രസ് നേതാവായിരുന്ന മുഫ്തി മുഹമ്മദ് സെയ്ദ് 1999 ലാണ് ജെകെപിഡിപി രൂപീകരിച്ചത്. ശേഷം മകൾ മെഹമൂദ മുഫ്തിയിലേക്ക് പാർട്ടിയുടെ കടിഞ്ഞാൺ എത്തി. കുടുംബ പാർട്ടിയായ കശ്മീർ പിഡിപിയിലെ മൂന്നാം തലമുറക്കാരിയായിട്ടാണ് ഇൽത്തിജ ചുമതലയേൽക്കുന്നത്.
