ആദിത്യ-എൽ1; ഇനി പ്രതീക്ഷയുടെ നാളുകൾ; രാജ്യത്തിന്റെ ആദ്യ സൗരദൗത്യത്തിന് കൗണ്ട്ഡൗൺ ആരംഭിച്ചു

ചെന്നൈ: രാജ്യത്തിന്റെ ആദ്യ സൗരദൗത്യം ആദിത്യ എൽ1 വിക്ഷേപണത്തിന് മുന്നോടിയായുള്ള കൗണ്ട്ഡൗൺ ആരംഭിച്ചു. 23 മണിക്കൂർ 40 മിനിറ്റ് നീളുന്ന കൗണ്ട് ഡൗൺ ഇന്ന് ഉച്ചയ്‌ക്ക് 12.10-നാണ് അരംഭിച്ചത്. നാളെ രാവിലെ 11.50-നാണ് പേടകത്തിന്റെ വിക്ഷേപണം. ഇതിന് മുന്നോടിയായി ഉപഗ്രഹവുമായി പിഎസ്എൽവി-സി57 റോക്കറ്റ് രണ്ടാം വിക്ഷേപണത്തറയിൽ എത്തിച്ചു.

ഭൂമിയിൽ നിന്നും ഏകദേശം 1.5 ദശലക്ഷം കിലോമീറ്റർ അകലെയുള്ള ഒന്നാം ലെഗ്രാഞ്ചേ ബിന്ദു അഥവാ എൽ1-ന് ചുറ്റുമുള്ള സാങ്കൽപ്പിക ഭ്രമണപഥത്തിലാണ് ആദിത്യ എൽ1 എത്തുക. 125 ദിവസത്തെ യാത്രക്കൊടുവിലാകും പേടകം ലക്ഷ്യ സ്ഥാനത്തെത്തുക. വിക്ഷേപണശേഷം കൊറോണൽ മാസ് ഇജക്ഷൻ ആണ് പ്രധാന പഠന വിഷയം.

സൗരാന്തരീക്ഷത്തിന്റെ മുകൾഭാഗം ചൂടാകുന്നതും ഇത് മൂലമുണ്ടാകുന്ന റോഡിയേഷനിലൂടെ ഭൂമിയുടെ അന്തരീക്ഷത്തിലും കാലാവസ്ഥയിലും ഉണ്ടാകുന്ന വ്യതിയാനങ്ങൾ എന്നിവ വിലയിരുത്തും. ഇതിനായി പ്രധാനമായും ഏഴ് പേലോഡുകളാണ് ആദിത്യയിലുള്ളത്. രാജ്യത്തെ വിവിധ സ്ഥാപനങ്ങളുടെ സംയുക്ത സഹകരണത്തോടെ പൂർണമായും തദ്ദേശിയമായി നിർമ്മിച്ചതാണ് ആദിത്യ എൽ1.