ഇന്ത്യൻ വംശജൻ തർമൻ ഷൺമുഖരത്‌നം സിംഗപ്പൂർ പ്രസിഡന്റ്

സിംഗപ്പൂർ: ഇന്ത്യൻ വംശജനായ തർമൻ ഷൺമുഖരത്നം സിംഗപ്പൂർ പ്രസിഡന്റ്. ചൈനീസ് വംശജരായ രണ്ട് മത്സരാർത്ഥികളെയാണ് തർമൻ പരാജയപ്പെടുത്തി. 70.4 ശതമാനം വോട്ടുകളാണ് തർമൻ നേടിയത്. തർമനെതിരെ മത്സരിച്ച മറ്റ് മത്സരാർത്ഥികളായ എൻജി കോക്ക് സോംഗ്, താൻ കിൻ ലിയാൻ എന്നിവർ യഥാക്രമം 15.7% 13.88% വോട്ടുകൾ നേടി. അറുപത്തിയാറുകാരനായ തർമൻ ഷൺമുഖരത്നം 2011 മുതൽ 2019 വരെ സിംഗപ്പൂരിന്റെ ഉപപ്രധാനമന്ത്രിയായി സേവനമനുഷ്ഠിച്ചിട്ടുണ്ട്. 2001 ലാണ് അദ്ദേഹം സിംഗപ്പൂർ രാഷ്‌ട്രീയത്തിൽ എത്തുന്നത്.

2.7 ദശലക്ഷത്തിലധികം വോട്ടർമാർ വോട്ട് രേഖപ്പെടുത്തി. രാവിലെ എട്ട് മണി മുതൽ എട്ട് വരെയായിരുന്നു വോട്ടിംഗ് സമയം. സിംഗപ്പൂരിന്റെ എട്ടാമത്തെയും ആദ്യത്തെ വനിതാ പ്രസിഡന്റുമായ മാഡം ഹലീമ യാക്കോബ് തന്റെ ആറ് വർഷത്തെ കാലാവധി സെപ്തംബർ 13 ന് സമാപിക്കും. 2011 ന് ശേഷമുള്ള സിംഗപ്പൂരിലെ ആദ്യത്തെ മത്സരാധിഷ്ഠിത പ്രസിഡൻറ് തെരഞ്ഞെടുപ്പാണ് ഈയിടെ നടന്ന തിരഞ്ഞെടുപ്പ്.