ജന്മാഷ്ടമി; സംസ്ഥാനത്ത് ഒരുക്കങ്ങൾ പുരോഗമിക്കുന്നു

എറണാകുളം: ജന്മാഷ്ടമി ആഘോഷങ്ങളുടെ ഭാഗമായി സംസ്ഥാനത്ത് ഒരുക്കങ്ങൾ പുരോഗമിക്കുന്നു. ശ്രീകൃഷ്ണ ക്ഷേത്രങ്ങളിൽ നാളെ രാവിലെ മുതൽ ആഘോഷങ്ങൾ ആരംഭിക്കും. പിന്നാലെ അർദ്ധരാത്രിയിൽ പ്രത്യേക പൂജകളും പ്രാർത്ഥനയും നടക്കും. ബാലഗോകുലത്തിന്റെ നേതൃത്വത്തിൽ നടക്കുന്ന ശോഭാ യാത്രകളിൽ കുട്ടികൾ വിവിധ വേഷധാരികളായി അണിനിരക്കും.

അവതാര കഥകളുടെ ദൃശ്യാവിഷ്‌കരണവുമായി നിശ്ചലദൃശ്യങ്ങൾ, വാദ്യമേളങ്ങൾ, കലാരൂപങ്ങൾ, ഭജന സംഘങ്ങൾ എന്നിങ്ങനെ വിവിധ സംഘങ്ങൾ നഗരവീഥികളിൽ അണിനിരക്കും. കുട്ടികൾ ശോഭയാത്രയിലൂടെ ക്ഷേത്രസന്നിധികളിലെത്തും. അമ്പാടിക്കണ്ണൻ, രാധ, ഭാരതാംബ, പാർവതി, ലക്ഷ്മി, സരസ്വതി, സീത, മുരുകൻ, ഹനുമാൻ, ശിവൻ, ലക്ഷ്മണൻ, ഭരതൻ, ശത്രുഘ്‌നൻ എന്നിങ്ങനെ വിവിധ വേഷങ്ങളിലാകും കുട്ടികളെത്തുക.

ഇന്ന് വൈകുന്നേരം പ്രധാന കേന്ദ്രങ്ങളിൽ ഉറിയടി ഉൾപ്പെടെ വിവിധ പരിപാടികളും നടക്കും. ഒരാഴ്ച നീണ്ടുനിന്ന ബാലഗോകുലത്തിന്റെ ജന്മാഷ്ടമി ആഘോഷങ്ങൾക്ക് നാളെ ശോഭയാത്രയോടെ സമാപനമാകും.