പ്രഭാസ് നായകനായെത്തുന്ന പുതിയ ചിത്രം ‘കല്ക്കി 2898 എഡി’യിലെ ഫോട്ടോകള് ലീക്കായതായി റിപ്പോര്ട്ട്. സിനിമയിലെ നടൻ പ്രഭാസിന്റെ ചിത്രങ്ങൾ ലീക്കായതായാണ് വിവരം. ഇതോടെ ചിത്രത്തിന്റെ നിര്മ്മാതാക്കള് രംഗത്തെത്തുകയും പ്രഭാസിന്റെ ഫോട്ടോകള് പ്രചരിപ്പിക്കരുതെന്ന് പ്രേക്ഷകരോട് അഭ്യര്ത്ഥിക്കുകയും ചെയ്തു.
നാഗ് അശ്വിൻ സംവിധാനവും തിരക്കഥയുമെഴുതുന്ന ചിത്രം വൻ ബജറ്റിലാണ് ഒരുങ്ങുന്നത്. ഇന്ത്യൻ മിത്തോളജി ആസ്പദമാക്കിയുള്ളതായിരിക്കും ചിത്രം. വമ്പൻ താരനിരയാണ് ചിത്രത്തിലെത്തുന്നത്. കമല്ഹാസൻ, അമിതാഭ് ബച്ചൻ എന്നീ താരങ്ങളും പ്രഭാസിനൊപ്പം വേഷമിടുന്നുണ്ട് എന്നതും ആകാംക്ഷ ഇരട്ടിയാക്കുന്നു. ചിത്രത്തില് ദീപീക പദുക്കോണാണ് നായിക. വൈജയന്തി മൂവീസിന്റെ ബാനറിൽ അശ്വിനി ദത്താണ് ചിത്രം നിർമ്മിക്കുന്നത്. പ്രഭാസ് സൂപ്പർ ഹീറോയായി എത്തുന്ന ചിത്രത്തിൽ ദിഷാ പഠാനി തമിഴ് താരം പശുപതി എന്നിവരും പ്രധാന വേഷങ്ങളിലെത്തുന്നുണ്ട്.
‘കല്ക്കി 2898 എഡി’യുടെയും പാട്ടുകള് ഒരുക്കുന്നത് തമിഴകത്തെ നിരവധി ഹിറ്റ് ഗാനങ്ങള്ക്ക് സംഗീതം നല്കിയ സന്തോഷ് നാരായണനാണ്. നേരത്തെ പുറത്തിറങ്ങിയ പ്രഭാസിന്റെയും ദീപികയുടെയും ക്യാരക്ടർ പോസ്റ്ററുകൾ ഏറെ ശ്രദ്ധിക്കപ്പെട്ടിരുന്നു. സയൻസ് ഫിക്ഷൻ വിഭാഗത്തിൽപ്പെടുന്ന ചിത്രം 2020 ഫെബ്രുവരിയിലാണ് പ്രഖ്യാപിച്ചത്. ഏറ്റവും ചെലവേറിയ ഇന്ത്യൻ സിനിമയായ ‘കൽക്കി 2898’ 2024 ജനുവരി 12ന് തിയേറ്ററുകളിലെത്തും.
