മുംബൈ: എട്ടുവര്ഷത്തെ ഇടവേളയ്ക്ക് ശേഷം ലോക ക്രിക്കറ്റിലെ മികച്ച ബൗളര് ഐപിഎല്ലിലേക്ക് തിരിച്ചുവരുന്നു. അടുത്ത വര്ഷം നടക്കുന്ന ഐപിഎല് ലേലത്തില് പങ്കെടുക്കുമെന്ന് ഓസ്ട്രേലിയയുടെ മുന് ആര്സിബി താരം മിച്ചല് സ്റ്റാര്ക്ക് അറിയിച്ചു. ദേശീയ ടീമില് ശ്രദ്ധ കേന്ദ്രീകരിക്കാനാണ് താരം വര്ഷങ്ങളോളം ഐപിഎല്ലില് നിന്ന് വിട്ടുനിന്നത്.
വില്ലോ ടോക് ക്രിക്കറ്റ് പോഡ്കാസ്റ്റിലാണ് താരം തന്റെ മടങ്ങിവരവിനെക്കുറിച്ച് വാചാലനായത്. 2015ലാണ് സ്റ്റാര്ക്ക് ഐപിഎല്ലില് അവസാനമായി കളിച്ചത്. അടുത്ത വര്ഷം ജൂണില് വെസ്റ്റ് ഇന്ഡീസിലും അമേരിക്കയിലുമായി ടി20 ലോകകപ്പ് നടക്കുന്നതിനാല് ഇതിനുള്ള മികച്ച മുന്നൊരുക്കമാവും ഐപിഎല്ലെന്നാണ് സ്റ്റാര്ക്കിന്റെ നിലപാട്.
2014ലും 2015ലും റോയല് ചലഞ്ചേഴ്സ് ബാംഗ്ലൂരിനായി കളിച്ചിട്ടുള്ള സ്റ്റാര്ക്ക് 27 മത്സരങ്ങളില് 34 വിക്കറ്റെടുത്തിട്ടുണ്ട്. 2018ലെ ഐപിഎല് ലേലത്തില് പങ്കെടുത്ത സ്റ്റാര്ക്ക് കൊല്ക്കത്ത നൈറ്റ് റൈഡേഴ്സ് താരമായെങ്കിലും ഒരു മത്സരം പോലും കളിക്കാതെ പരിക്ക മൂലം പിന്മാറിയിരുന്നു.
സ്റ്റാര്ക്കിനെ മുംബൈ ജേഴ്സിയില് കാണാന് ആഗ്രഹിക്കുന്നുണ്ടോ എന്ന ചോദ്യവുമായി മുംബൈ ഇന്ത്യന്സ് തന്നെ രംഗത്തെത്തുകയും ചെയ്തു. പരിക്കുണ്ടായിട്ടും ജോഫ്ര ആര്ച്ചറെ ടീമിലെത്തിച്ചതുപോലെ മുംബൈ സ്റ്റാര്ക്കിനായും രംഗത്തെത്തുമെന്നാണ് ആരാധകര് കരുതുന്നത്.
Comments