തിരുവനന്തപുരം: ചെയറിനെ നോക്കി സംസാരിക്കാന്‍ പറഞ്ഞ സ്പീക്കര്‍ എ.എൻ ഷംസീറിനോട് നിങ്ങൾ സുന്ദരനാണെന്ന് പറഞ്ഞ് ഏറനാട് എംഎല്‍എ പി.കെ ബഷീര്‍. ഏറനാടന്‍ ശൈലിയില്‍ സര്‍ക്കാരിനെതിരെ വിമര്‍ശനം ഉന്നയിക്കുന്നതിനിടെയാണ് സ്പീക്കർ ഇടപ്പെട്ടത്. ഇതോടെ, ‘ങ്ങള് സുന്ദരമാണ്, ങ്ങള് ഉഷാറാണ്’ എന്ന് സ്പീക്കറെ നോക്കി മറുപടി കൊടുക്കുകയായിരുന്നു പി.കെ ബഷീര്‍.
പുതുപ്പള്ളി തിരഞ്ഞെടുപ്പില്‍ തുടങ്ങിയ വിമർശനത്തിൽ കമ്യൂണിസ്റ്റ് പാര്‍ട്ടിയുടെ തോൽവിയെയും ഭാവിയെയും വരെ പി.കെ ബഷീര്‍ വിമർശിച്ചു. ത്രിപുരയിൽ ന്യൂനപക്ഷ വോട്ടർമാർ ഭൂരിപക്ഷമുള്ള വാർഡിൽ സിപിഎമ്മിനെ തോൽപ്പിച്ച് ബിജെപി സ്ഥാനാർത്ഥി വിജയിച്ചത് ചൂണ്ടിക്കാണിച്ചാണ് സിപിഎമ്മിനെ ഏറനാട് എംഎല്‍എ പരിഹസിച്ചത്.
ബംഗാളിൽ സിപിഎമ്മിനെ തൃണമൂൽ കോൺഗ്രസ് തോൽപ്പിച്ചു. അവസാനം അതിജീവനത്തിന് വേണ്ടി സിപിഎം കോൺഗ്രസിനൊപ്പം ചേർന്നു. എന്നിട്ടും സിപിഎമ്മിന് വോട്ട് കിട്ടിയില്ല എന്നും എംഎൽഎ പറഞ്ഞു. സിപിഎമ്മിനെതിരെ വിമർശനം ഉന്നയിക്കുന്നതിനിടെയാണ് ചെയറിനെ നോക്കി സംസാരിക്കാൻ സ്പീക്കർ പറഞ്ഞത്. ഈ സമയമാണ് എ.എൻ ഷംസീർ സുന്ദരനാണെന്ന് എംഎല്‍എ തനത് ശൈലിയിൽ പുകഴ്‌ത്തിയത്.
