പത്തനംതിട്ട : ശബരിമല ശ്രീധര്മ്മശാസ്താക്ഷേത്ര തിരുനട കന്നിമാസ പൂജകള്ക്കായി സെപ്റ്റംബര് 17 ന് (ഞായറാഴ്ച) വൈകുന്നേരം 5 മണിക്ക് തുറക്കും. ക്ഷേത്രമേല്ശാന്തി കെ.ജയരാമന് നമ്പൂതിരി ക്ഷേത്ര തന്ത്രി കണ്ഠരര് മഹേഷ് മോഹനരുടെ മുഖ്യകാര്മ്മികത്വത്തില് (Chiefly) ക്ഷേത്ര ശ്രീകോവില് നടതുറന്ന് ദീപങ്ങള് തെളിയിക്കും.
തുടർന്ന് ഗണപതി, നാഗര് എന്നീ ഉപദേവതാക്ഷേത്ര നടകളുംതുറന്ന് വിളക്കുകള് തെളിയിച്ചശേഷം മേല്ശാന്തി ആഴിയില് അഗ്നി പകരും. അയ്യപ്പഭക്തര്ക്ക് വിഭൂതി പ്രസാദം വിതരണം ചെയ്യുന്നത് തന്ത്രി കണ്ഠരര് മഹേഷ് മോഹനര് ആണ് . മാളികപ്പുറം മേല്ശാന്തി വി. ഹരിഹരന് നമ്പൂതിരിയും മാളികപ്പുറം ക്ഷേത്രനട തുറന്ന് ദീപങ്ങള് തെളിയിച്ച് ഭക്തര്ക്ക്മഞ്ഞള്പ്രസാദം വിതരണം ചെയ്യും.
നട തുറക്കുന്ന 17 ന് ശബരിമല അയ്യപ്പസന്നിധിയിലും മാളികപ്പുറം ക്ഷേത്രത്തിലും പൂജകള് ഒന്നും തന്നെ ഉണ്ടാവില്ല. അന്ന് രാത്രി 10 മണിക്ക് തിരുനട അടയ്ക്കുകായും ചെയ്യും. സെപ്റ്റംബര് 18 ന് (കന്നി ഒന്ന് ) പുലര്ച്ചെ 5 മണിക്ക് ക്ഷേത്ര തിരുനട തുറക്കും.തുടർന്ന് നിര്മ്മാല്യ ദര്ശനം അഭിഷേകം , 5.30 ന് മഹാഗണപതിഹോമം, നെയ്യഭിഷേകം , 7.30 ന് ഉഷപൂജ. 12.30 ന് ഉച്ചപൂജ.
ഉദയാസ്തമയപൂജ, 25കലശാഭിഷേകം, കളഭാഭിഷേകം, പടിപൂജ, പുഷ്പാഭിഷേകം എന്നിവ സെപ്റ്റംബര് 18 മുതല് 22 വരെയുള്ള 5 ദിവസങ്ങളില് ഉണ്ടാകും. ഉച്ചയ്ക്ക് ഒരു മണിക്ക് തിരുനട അടയ്ക്കുകയും വൈകുന്നേരം 5 മണിക്ക് വീണ്ടും തുറക്കുകയും ചെയ്യും.
ശബരിമല ദർശനത്തിനു ഏർപ്പെടുത്തിയ വെര്ച്വല് ക്യൂ സംവിധാനം ഇക്കുറിയും ഉണ്ടായിരിക്കും.ഇതിലൂടെ ബുക്ക് ചെയ്ത് ഭക്തര്ക്ക് ദര്ശനത്തിനായി എത്തിച്ചേരാവുന്നതാണ്. നിലയ്ക്കല്, പമ്പ എന്നിവിടങ്ങളില് സ്പോട്ട് ബുക്കിംഗ് സംവിധാനവും ഒരുക്കിയിട്ടുണ്ട്.
സെപ്റ്റംബര് 22 ന് രാത്രി 10മണിക്ക് 5 ദിവസത്തെ പൂജകള് പൂര്ത്തിയാക്കി ഹരിവരാസനം പാടി ക്ഷേത്രതിരുനട അടയ്ക്കും. ഒക്ടോബര് 18 ന് ആണ് തുലാം ഒന്ന്. തുലാമാസ പൂജകള്ക്കായി ശബരിമല ക്ഷേത്രനട ഒക്ടോബര് 17ന് വൈകുന്നേരം 5 മണിക്ക് തുറക്കും.
