ചിമ്പു, ധനുഷ്, വിശാൽ, അഥർവ എന്നീ താരങ്ങൾക്ക് ചുവപ്പ് കാർഡ്: കടുത്ത നടപടിയുമായി തമിഴ് ഫിലിം പ്രൊഡ്യൂസേഴ്‌സ് അസോസിയേഷൻ

ചെന്നൈ: നാല് യുവനടന്മാർക്കെതിരെ കടുത്ത നടപടിയുമായി തമിഴ് ഫിലിം പ്രൊഡ്യൂസേഴ്‌സ് അസോസിയേഷൻ. ചിമ്പു, ധനുഷ്, വിശാൽ, അഥർവ എന്നീ നാല് താരങ്ങൾക്ക് അസോസിയേഷൻ വക ചുവപ്പ് കാർഡ് ലഭിച്ചു. കുറച്ച് മാസങ്ങൾക്ക് മുമ്പ് തമിഴ് ഫിലിം പ്രൊഡ്യൂസേഴ്‌സ് അസോസിയേഷന്റെ ജനറൽ ബോഡി യോഗം ചേർന്ന് സഹകരിക്കാത്ത അഭിനേതാക്കളുമായി പ്രവർത്തിക്കില്ലെന്ന് പ്രമേയം പാസാക്കിയിരുന്നു. കഴിഞ്ഞ ജൂലൈയിൽ അഭിനേതാക്കളുടെ സംഘടനയുമായി കൂടിയാലോചന നടത്തിയശേഷം നിർമാതാക്കളുമായി സഹകരിക്കാത്ത താരങ്ങൾക്ക് ചുവപ്പ് കാർഡ് നൽകാൻ പ്രൊഡ്യൂസേഴ്‌സ് അസോസിയേഷൻ തീരുമാനിച്ചു. ധനുഷ്, അമല പോൾ, ലക്ഷ്മി റോയ് എന്നിവരുൾപ്പെടെ 14 നടന്മാർക്കും നടിമാർക്കും ചുവപ്പ് കാർഡ് നൽകുമെന്നും പറഞ്ഞിരുന്നു.

ഇതനുസരിച്ച് തമിഴ് ഫിലിം പ്രൊഡ്യൂസേഴ്‌സ് അസോസിയേഷന്റെ എക്‌സിക്യൂട്ടീവ് കമ്മിറ്റി യോഗം ഇന്നലെ (14.09.2023) ചെന്നൈയിൽ ചേർന്നു. ധനുഷ്, വിശാൽ, ചിമ്പു, അഥർവ എന്നിവരുൾപ്പെടെ 4 നടന്മാർക്കെതിരെ നടപടിയെടുക്കാൻ തീരുമാനിച്ചു.തേനാൻഡൽ ഫിലിംസ് മുരളി നിർമ്മിച്ച ചിത്രത്തിന്റെ 80 ശതമാനം ചിത്രീകരണം പൂർത്തിയായപ്പോൾ ചിത്രീകരണത്തിന് എത്താതിരുന്നതിന് ധനുഷിന് ചുവപ്പ് കാർഡ് ലഭിച്ചു. നിർമ്മാതാവിന് കടുത്ത നഷ്‌ടം വരുത്തിയെന്നതാണ് ധനുഷിനെതിരെയുള്ള ആരോപണം. പ്രൊഡ്യൂസർ അസോസിയേഷൻ പ്രസിഡന്റായിരിക്കെ യൂണിയൻ പണം ദുരുപയോഗം ചെയ്തതിനാണ് വിശാലിന് ചുവപ്പ് കാർഡ് ലഭിച്ചത്.

നിർമ്മാതാവ് മൈക്കിൾ രായപ്പൻ ഇതിനോടകം പലതവണ ചിമ്പുവിനെതിരെ പരാതി നൽകിയിരുന്നു, തുടർന്ന് പരിഹാരം കാണാൻ ചർച്ചകൾ നടന്നു. പ്രശ്‌നം പരിഹരിക്കാൻ കഴിയാത്തതിനാൽ ചുവപ്പ് കാർഡും നൽകി. നിർമ്മാതാവ് മതിയഴകൻ നൽകിയ പരാതിയെ തുടർന്നാണ് അഥർവയ്‌ക്ക് ചുവപ്പ് കാർഡ് ലഭിച്ചത്.

കടുത്ത താരാധിപത്യമുള്ള തമിഴ് നാട്ടിൽ ഇതാദ്യമായാണ് നിർമ്മാതാക്കളുടെ സംഘടന ഇങ്ങിനെ ഒരു തീരുമാനം എടുക്കുന്നത്.ഇനിയൊരു അറിയിപ്പ് ഉണ്ടാകുന്നതുവരെ തമിഴ് സിനിമയിലെ ഒരു നിർമ്മാതാവും ഇവരെ വെച്ച് ചിത്രമെടുക്കില്ല. അതുകൊണ്ട് ചുവപ്പ് കാർഡ് താരങ്ങൾക്ക് കടുത്ത ശിക്ഷയാണ്.

അഭിനേതാക്കൾ തങ്ങളുടെ കുടിശ്ശിക തീർക്കുകയോ നിർമ്മാതാക്കളുമായുള്ള തർക്കങ്ങൾ പരിഹരിക്കുകയോ ചെയ്യുന്നത് വരെ, അവരെ ഒരു തമിഴ് സിനിമയിലും പ്രവർത്തിക്കാൻ അനുവദിക്കില്ല.

നിലവിൽ പ്രശ്‌നത്തിലുള്ള നാല് താരങ്ങളും ആരോപണങ്ങളോട് ഇതുവരെ പ്രതികരിച്ചിട്ടില്ല. വിശാലിന്റെ വരാനിരിക്കുന്ന റിലീസ് മാർക്ക് ആന്റണിയും ധനുഷിന്റെ ചിത്രം ക്യാപ്റ്റൻ മില്ലറും ഇതോടെ അനിശ്ചിതത്വത്തിൽ ആയിരിക്കുന്നു. മാർക്ക് ആന്റണിചിത്രത്തിന്റെ റിലീസ് തിയതി നാളെയാണ്.