ന്യൂഡൽഹി: വന്ദേ ഭാരത് എക്സ്പ്രസിന്റെ സ്ലീപ്പർ പതിപ്പ് വൈകാതെ തന്നെ ഇന്ത്യൻ റെയിൽവേ അവതരിപ്പിക്കുമെന്ന് ഇന്റഗ്രൽ കോച്ച് ഫാക്ടറി ജനറൽ മാനേജർ ബിജി മല്യ. വന്ദേ മെട്രോ ഉടനെത്തുമെന്നും നോൺ എസി പുഷ്-പുൾ ട്രെയിൻ വരുമെന്നും അദ്ദേഹം മാദ്ധ്യമങ്ങളോട് പ്രതികരിച്ചു.
ഈ സാമ്പത്തിക വർഷത്തിനകം തന്നെ വന്ദേ ഭാരതിന്റെ സ്ലീപ്പർ പതിപ്പ് പുറത്തിറക്കും. വന്ദേ മെട്രോയും ഈ സാമ്പത്തിക വർഷം അവതരിപ്പിക്കും. 22 കോച്ചുകളും ഒരു ലോക്കോമോട്ടീവും ഉള്ള നോൺ എസി പുഷ്-പുൾ ട്രെയിൻ എന്ന് വിളിക്കപ്പെടുന്ന ട്രെയിനും ജനങ്ങൾക്കായി നൽകും. എയർ കണ്ടീഷൻ ചെയ്യാത്ത ഇത്തരം ട്രെയിൻ ഒക്ടോബർ 31-ന് മുമ്പ് നാടിനായി സമർപ്പിക്കാൻ കഴിയുമെന്നാണ് പ്രതീക്ഷിക്കുന്നതെന്നും ഇന്റഗ്രൽ കോച്ച് ഫാക്ടറി ജനറൽ മാനേജർ അറിയിച്ചു.
‘നമോ എക്സ്പ്രസ്’ എന്ന് പേരിട്ട ഗണപതി സ്പെഷ്യൽ ട്രെയിൻ മഹാരാഷ്ട്ര ഉപമുഖ്യമന്ത്രി ദേവേന്ദ്ര ഫഡ്നാവിസ് ഫ്ലാഗ് ഓഫ് ചെയ്തുിരുന്നു. മുംബൈ ദാദർ സ്റ്റേഷനിൽ നിന്ന് കൊങ്കണിലേക്കുള്ള ട്രെയിനാണിത്. വിനായക ചതുർത്ഥി ആഘോഷം വരാനിരിക്കുന്നതിന്റെ പശ്ചാത്തലത്തിൽ കൊങ്കൺ മേഖലയിലേക്ക് പോകുന്ന ഭക്തർക്കായി ആറ് പ്രത്യേക ട്രെയിനുകളും 338 ബസുകളും ക്രമീകരിച്ചിട്ടുണ്ട്.
Comments