പാലക്കാട്: വീട്ടമ്മയുടെ മോർഫ് ചെയ്ത അശ്ലീല ചിത്രങ്ങൾ മകളുടെ ഫോണിലേക്ക് അയച്ച് ഭീഷണി. പാലക്കാട് കൊല്ലങ്കോട് സ്വദേശിനിക്കാണ് ഇത്തരത്തിൽ ഒരു ദുരനുഭവമുണ്ടായത്. വായ്പ തിരിച്ചടക്കണമെന്നാവശ്യപ്പെട്ടായിരുന്നു ഭീഷണി. എന്നാൽ കൊറോണ മഹാമാരി കാലത്ത് ഓൺലൈൻ വായ്പകളെ കുറിച്ച് അന്വേഷിച്ചെങ്കിലും വായ്പ എടുത്തിട്ടില്ലെന്നായിരുന്നു വീട്ടമ്മയുടെ പ്രതികരണം.
ഓൺലൈൻ വായ്പകളെ കുറിച്ചറിയാൻ ആധാർ ഉൾപ്പെടെയുള്ള വിവരങ്ങൾ ബന്ധപ്പെട്ട നമ്പറിലേക്ക് വീട്ടമ്മ അയച്ചു കൊടുത്തിരുന്നു. പിന്നീട് വീട്ടമ്മയുടെ വാട്ട്സ് ആപ്പ് നമ്പർ ആവശ്യപ്പെട്ടുകൊണ്ട് ഫോൺ കോളുകൾ വന്നിരുന്നു. തുടർന്ന് മകളുടെ ഫോൺ നമ്പർ നൽകുകയായിരുന്നു. ഇതോടെ 13,000 രൂപയിലധികം വായ്പ തിരിച്ചടക്കണമെന്ന് ആവശ്യപ്പെട്ട് നിരവധി ഫോൺ കോളുകൾ വരാൻ തുടങ്ങുകയും വീട്ടമ്മയുടെ മോർഫ് ചെയ്ത ചിത്രങ്ങൾ അയയ്‌ക്കാനും തുടങ്ങി. ചിത്രങ്ങൾ അയച്ച നമ്പറിനെതിരെ പാലക്കാട് സൈബർ പോലീസിൽ പരാതി നൽകിയതായും ഇവർ പറഞ്ഞു.
