മുംബൈ: വിനായക ചതുർത്ഥി ആഘോഷിച്ച് ബോളിവുഡ് താരങ്ങൾ. മുകേഷ് അംബാനിയുടെ വസതിയായ മുംബൈയിലെ അന്റീലിയയിലേക്ക് നിരവധി ബോളിവുഡ് താരങ്ങളാണ് കുടുംബസമേതം എത്തിയത്. മനീഷ് മൽഹോത്രയുടെ വസതിയിൽ സംഘടിപ്പിച്ച ഗണപതി പൂജയിലും തുടർന്നുള്ള ആഘോഷങ്ങളിൽ പങ്കെടുക്കാനും സിദ്ധാർത്ഥ് മൽഹോത്രയും സാറാ അലീ ഖാനും അടക്കമുള്ള താരങ്ങളും എത്തിയിരുന്നു. അതേസമയം സ്വവസതിയിൽ ആഘോഷങ്ങൾ സംഘടിപ്പിച്ചവരും ഏറെയാണ്.
ക്രിക്കറ്റ് താരം വിരാട് കോഹ്ലിയും ബോളിവുഡ് നടി അനുഷ്‌കാ ശർമ്മയും മകളോടൊപ്പം വീട്ടിലാണ് ഗണേശ ചതുർത്ഥി ആഘോഷിച്ചത്. വിനായക ചതുർത്ഥിയോടനുബന്ധിച്ച് പൂജയിൽ പങ്കെടുക്കുന്നതിന്റെ ചിത്രങ്ങൾ അനുഷ്‌ക ഇൻസ്റ്റഗ്രാമിൽ പങ്കുവയ്‌ക്കുകയും ആരാധകർക്ക് ആശംസകൾ നേരുകയും ചെയ്തു. പരമ്പരാഗതമായ വസ്ത്രങ്ങൾ ധരിച്ചാണ് അനുഷ്‌കയും കോഹ്ലിയും ആഘോഷങ്ങളുടെ ഭാഗമായത്. ചുവപ്പും ഗോൾഡനും നിറമുള്ള സാരി ധരിച്ച അനുഷ്‌ക സ്ലീക് ബൺ ഉപയോഗിച്ച് ഹെയർ സ്‌റ്റൈൽ ചെയ്തിരുന്നു. അതേസമയം വെള്ള നിറത്തിലുള്ള പൈജാമയാണ് വിരാട് ധരിച്ചിരുന്നത്.
സ്‌പോർട് ബയോപിക് ചിത്രമായ ഛക്ദാ എക്‌സ്പ്രസ് ആണ് അനുഷ്‌കയുടെ വരാനിരിക്കുന്ന ചിത്രം. ഇന്ത്യയുടെ മുൻ ക്രിക്കറ്ററായ ജൂലൻ ഗോസ്വാമിയുടെ കഥയാണ് സിനിമയിലൂടെ പറയുന്നത്.
