ഉപയോക്താക്കൾക്ക് ഡിജിറ്റൽ പണമിടപാട് സുഗമമാക്കുന്നതിനായി വാട്സ്ആപ്പ് ഉപയോക്താക്കൾക്കായി ആരംഭിച്ച സേവനമായിരുന്നു വാട്സ്ആപ്പ് പേ. പേയ്മെന്റ് സർവീസ് വിപുലീകരിച്ചതായുള്ള റിപ്പോർട്ടുകളാണ് പുറത്തുവരുന്നത്. എല്ലാ തരത്തിലുള്ള യുപിഐ പേയ്മെന്റ് ഓപ്ഷനുകളും ഡെബിറ്റ്- ക്രെഡിറ്റ് കാർഡുകൾ ഉപയോഗിച്ച് പണമിടപാടുകൾ നടത്താൻ കഴിയുന്ന വിധമാണ് വാട്സ്ആപ്പ് സംവിധാനം വിപുലീകരിച്ചിരിക്കുന്നത്.
ചാറ്റിൽ നിന്ന് കൊണ്ട് തന്നെ എളുപ്പത്തിൽ ബിസിനസ് ഇടപാട് നടത്താൻ കഴിയുന്ന വിധമാണ് പരിഷ്കരിച്ച സംവിധാനം. ഗൂഗിൾ പേ, പേടിഎം പോലുള്ള യുപിഐ സംവിധാനങ്ങൾ ഉപയോഗിച്ച് പണമിടപാട് നടത്താനും നിലവിൽ സാധിക്കും. ക്രെഡിറ്റ്, ഡെബിറ്റ് കാർഡുകൾ ഉപയോഗിച്ചും പണമിടപാട് നടത്താൻ കഴിയും എന്നതാണ് മറ്റൊരു പ്രത്യേകത. ബാങ്ക് അക്കൗണ്ടുമായി ബന്ധിപ്പിച്ചിരിക്കുന്ന ഫോൺ നമ്പറും വാട്സ്ആപ്പിൽ ഉപയോഗിക്കുന്ന ഫോൺ നമ്പർ ഒന്നുതന്നെയായിരിക്കണം.
മൊത്തം വാട്സ്ആപ്പ് ഉപയോക്താക്കളിൽ 10 കോടി ആളുകൾക്ക് മാത്രമേ ഇന്ത്യയിൽ വാട്സ്ആപ്പ് പേ ഉപയോഗിച്ച് പണമിടപാട് നടത്താൻ കഴിയൂ. എന്നാൽ മറ്റു യുപിഐ സംവിധാനങ്ങൾ, ഡെബിറ്റ്, ക്രെഡിറ്റ് കാർഡ് എന്നിവ ഉപയോഗിച്ചും വാട്സ്ആപ്പിലെ ബിസിനസുകളുമായി ബന്ധപ്പെട്ട് ഇടപാടുകൾ നടത്താൻ കഴിയും വിധമാണ് പുതിയ സംവിധാനം.
