ചെന്നൈ: വിഗ്രഹ നിർമാണശാലകൾ അടച്ചുപൂട്ടിയ തമിഴ്നാട് സർക്കാറിന്റെ നടപടിക്കെതിരെ മദ്രാസ് ഹൈക്കോടതി. ഗണേശ വിഗ്രഹങ്ങൾ ജലാശായങ്ങളിൽ നിമജ്ജനം ചെയ്യുന്നത് പാരിസ്ഥിതിക പ്രശ്നങ്ങൾ ഉണ്ടാക്കുമെന്ന് ന്യായം പറഞ്ഞാണ് സ്റ്റാലിൻ സർക്കാർ വിഗ്രഹ നിർമാണശാലകളുടെ പ്രവർത്തനം നിർത്തിവെപ്പിച്ചത്. ഒപ്പം കടകളിൽ വിഗ്രഹ വിൽപ്പനയ്ക്ക് നിരോധനം ഏർപ്പെടുത്തുകയും ചെയ്തിരുന്നു.ഗണേശ ചതുർത്ഥിയുടെ ഭാഗമായി തമിഴ്നാട്ടിൽ ഗണേശ വിഗ്രഹ വിൽപ്പന ഉച്ചസ്ഥായിയിൽ നിൽക്കുമ്പോഴായിരുന്നു സർക്കാരിന്റെ നടപടി.
പാളയംകോട്ടയിൽ വിഗ്രഹ നിർമാണം നടത്തുന്ന രാജസ്ഥാൻ സ്വദേശി പ്രകാശ് നല്കിയ ഹർജിയിലാണ് ഡിഎംകെ സർക്കാരിനെ കോടതി രൂക്ഷമായ ഭാഷയിൽ വിമർശിച്ചത്. വിഗ്രഹ നിമജ്ജനം ചെയ്യുന്നത് നിയന്ത്രിക്കാനുള്ള അധികാരം സർക്കാരിനുണ്ട്. എന്നാൽ വിൽപ്പന തടയുന്നത് വില്പന തടയുന്നത് ഹരജിക്കാരന്റെ മൗലികാവകാശത്തിന്റെ ലംഘനത്തിന് കാരണമാകുമെന്ന് കോടതി നിരീക്ഷിച്ചു.നിർമിച്ച വിഗ്രഹങ്ങൾ വിൽക്കുന്നതിൽ നിന്ന് ഹരജിക്കാരനെ തടയരുതെന്നും ഹൈക്കോടതി ഉത്തരവിട്ടു.
ഗണേശ ചതുർത്ഥി മുന്നിൽ കണ്ട് സർക്കാർ നിർദ്ദേശിച്ച മാനദണ്ഡ പ്രകാരമാണ് ഗണേശ വിഗ്രഹങ്ങൾ നിർമ്മിച്ചത്. നിർദ്ദേശങ്ങൾ പാലിച്ച് അനുവദനീയമായ അളവിൽ മാത്രമേ പ്ലാസ്റ്റർ ഓഫ് പാരീസ് ഉപയോഗിച്ചിട്ടുള്ളൂവെന്നും ഹരജിക്കാരൻ കോടതിയെ അറിയിച്ചു. എന്നിട്ടും വിഗ്രഹങ്ങൾ വിൽക്കുന്നതിൽ നിന്ന് പോലീസ് തടയുകയായിരുന്നുവെന്നും ഹർജിക്കാരന് വേണ്ടി ഹാജരായ അഭിഭാഷകൻ വി. രാമസുബ്ബു ഹൈക്കോടതിയെ ബോധിപ്പിച്ചു.
വിഗ്രഹങ്ങൾ വിൽപ്പന തടസ്സപ്പെട്ടാൽ സാമ്പത്തികമായി തകരുമെന്നും വലിയ തുക കടം വാങ്ങിയാണ് നിർമാണം തുടങ്ങിയതെന്നും ഹരജിക്കാരൻ കോടതിയിൽ പറഞ്ഞു. മലിനീകരണ നിയന്ത്രണ ബോർഡ് ഉത്തരവിനെ തുടർന്നാണ് വിഗ്രഹങ്ങൾ വില്കുന്നതിൽ നിന്ന് ഹർജിക്കാരനെ തടഞ്ഞതെന്ന വാദമാണ് അധികൃതർ ഉന്നയിച്ചത്.
പരിസ്ഥിതി സൗഹൃദമായി നിർമ്മിക്കുന്ന വിഗ്രഹങ്ങളുടെ
വിൽപ്പന തടയുന്നത് ഒരു കാരണവശാലും അനുവദിക്കാനാകില്ല. പോലീസോ സർക്കാർ അധികൃതരോ കച്ചവടത്തിന് നഷ്ടം ഉണ്ടാക്കിയാൽ നഷ്ടപരിഹാരം നല്കാൻ അവർ ബാധ്യസ്ഥരാണെന്നും കോടതി നിരീക്ഷിച്ചു.
