ഇന്ത്യയുടെ ചാന്ദ്രദൗത്യം ഉറക്കമുണരുമെന്ന പ്രതീക്ഷയിലാണ് രാജ്യം. ലാൻഡറും റോവറും ഒന്നിച്ച് ഉറക്കമുണർന്നില്ലെങ്കിലും ഇവയിൽ ഏതെങ്കിലും ഒന്നെങ്കിലും ഉണർന്നാലും ദൗത്യത്തിനേറെ ഗുണം ചെയ്യുമെന്ന് മുൻ ഇസ്രോ ശാസ്ത്രജ്ഞൻ തപൻ മിശ്ര വ്യക്തമാക്കി.
ഉണർന്നാൽ ലാൻഡറിന് ഒരു വർഷം വരെ പ്രവർത്തനക്ഷമമാകാൻ കഴിയുമെന്ന് അദ്ദേഹം പറഞ്ഞു. അത്രമാത്രം വൈദഗ്ധ്യത്തോടെയാണ് ഇസ്രോ ശാസ്ത്രജ്ഞർ പേടകം നിർമ്മിച്ചിരിക്കുന്നത്. ഹൈഡ്രജൻ കണ്ടെത്തുന്നത് ചന്ദ്രോപരിതലത്തിൽ ജലത്തിന്റെ സാന്നിധ്യം ഉറപ്പിക്കുമെന്നും അദ്ദേഹം വെളിപ്പെടുത്തി. പേടകം ഉണർന്ന് കൂടുതൽ പഠനങ്ങൾ നടത്തുമെന്ന ശുഭ പ്രതീക്ഷയിലാണ് ശാസ്ത്രലോകം.
വീണ്ടും പരിപൂർണ ആരോഗ്യത്തോടെ ലാൻഡറും റോവറും ഉണർന്നാൽ കുറഞ്ഞത് വരുന്ന 14 ഭൗമദിനങ്ങളെങ്കിലും ഇവ പ്രവർത്തിക്കുമെന്നാണ് വിലയിരുത്തൽ. ശാസ്ത്രീയവിവരങ്ങൾക്കും നിരീക്ഷണങ്ങൾക്കും വൻ മുതൽ കൂട്ടാകും ഇതെന്ന കാര്യത്തിൽ സംശയമില്ല.