തിരുവനന്തപുരം: കേരളത്തിന് അനുവദിച്ച പുതിയ വന്ദേഭാരത് എക്സ്പ്രസിന് തിരൂരില് സ്റ്റോപ്പ് അനുവദിച്ചു. പാസഞ്ചേഴ്സ് അമിനിറ്റീസ് കമ്മറ്റി പി കെ കൃഷ്ണദാസ് കേന്ദ്ര റയിൽവേ മന്ത്രി അശ്വിനി വൈഷ്ണവിന് നൽകിയ നിവേദനത്തെ തുടർന്നാണ് തിരൂരിൽ സ്റ്റോപ്പ് അനുവദിച്ചത്. ഇതിനു പിന്നാലെ ബിജെപി നിർവാഹക സമിതി അംഗം പികെ കൃഷ്ണദാസ്കേന്ദ്ര റെയിൽവേ മന്ത്രിക്ക് നന്ദി അറിയിച്ചു . ഫേസ്ബുക്ക് കുറിപ്പിലീടെയാണ് അദ്ദേഹം നന്ദിയറിച്ചത്.
വന്ദേ ഭാരത് എക്സ്പ്രസിന് തിരൂർ റെയിൽവേ സ്റ്റേഷനിൽ സ്റ്റോപ്പ് അനുവദിക്കണമെന്ന് ആവശ്യപ്പെട്ട് വിവിധ യാത്രക്കാരുടെ സംഘടനകളിൽ നിന്നും, പാസഞ്ചേഴ്സ് അസോസിയേഷനിൽ നിന്നും നിവേദനം നൽകിയിരുന്നതായി അദ്ദേഹം കുറിപ്പിൽ പറയുന്നു. തുടർന്ന് നിവേദനങ്ങൾ കേന്ദ്ര റെയിൽവേ മന്ത്രി അശ്വിനി വെെഷ്ണവിന് നൽകുകയും ചെയ്തു. ഉചിതമായ നടപടി സ്വീകരിക്കുമെന്ന് മന്ത്രി അന്നുതന്നെ ഉറപ്പുനൽകിയിരുന്നെന്നും പികെ കൃഷ്ണദാസ് വ്യക്തമാക്കി.
പികെ കൃഷ്ണദാസിന്റെ ഫേസ്ബുക്ക് കുറിപ്പിന്റെ പൂർണ്ണരൂപം ഇങ്ങനെ…
പാസഞ്ചേഴ്സ് അമിനിറ്റീസ് കമ്മറ്റിയുടെ നേതൃത്വത്തിൽ തിരൂർ റെയിൽവേ സ്റ്റേഷൻ പരിശോധനയുടെ ഭാഗമായി സന്ദർശിക്കുന്ന സമയത്ത് വിവിധ യാത്രക്കാരുടെ സംഘടനകളിൽ നിന്നും, പാസഞ്ചേഴ്സ് അസോസിയേഷനിൽ നിന്നും വന്ദേ ഭാരത എക്സ്പ്രസിന് തിരൂർ റെയിൽവേ സ്റ്റേഷനിൽ സ്റ്റോപ്പ് അനുവദിക്കണമെന്ന് ആവശ്യപ്പെട്ട് നിവേദനം നൽകിയിരുന്നു. അതിന്റെ അടിസ്ഥാനത്തിൽ അവിടെ നിന്ന് നൽകിയ നിവേദനങ്ങൾ കേന്ദ്ര റെയിൽവേ മന്ത്രി അശ്വിനി വെെഷ്ണവിന് നൽകുകയും ചെയ്തിരുന്നു. പരിശോധിച്ചു ഉചിതമായ നടപടി സ്വീകരിക്കുമെന്ന് മന്ത്രി അന്നുതന്നെ ഉറപ്പുനൽകിയിരുന്നു. വന്ദേ ഭാരത് എക്സ്പ്രസിന് തിരൂർ റെയിൽവേ സ്റ്റേഷനിൽ സ്റ്റോപ്പ് അനുവദിച്ച കേന്ദ്ര റെയിൽവേ മന്ത്രിക്ക് അഭിനന്ദനങ്ങൾ. എന്നാണ് പികെ കൃഷ്ണദാസ് കുറിച്ചത്.
ബിജെപി മലപ്പുറം ജില്ല പ്രസിഡന്റ് രവി തേലത്ത് ഈ ആവശ്യത്തിന് കേന്ദ്ര റെയിൽവേ മന്ത്രിക്ക് നിവേദനം സമർപ്പിച്ചിച്ചിരുന്നു. ആദ്യ യാത്രയിൽ സെപ്തംബർ 24 വെെകിട്ട് 3.30 ന് വന്ദേഭാരത് എക്സ്പ്രസിന് സ്വീകരണം നൽകാനുള്ള എല്ലാ ഒരുക്കങ്ങളും കഴിഞ്ഞതായി ബിജെപി മലപ്പുറം ജില്ല കമ്മിറ്റി അറിയിച്ചു.