ഫോട്ടോ ക്രോപ്പ് ചെയ്ത് ബോധപൂർവ്വം പ്രചരിപ്പിക്കുകയാണ്, മറ്റുള്ളവരെ ബുദ്ധിമുട്ടിക്കുന്നത് വളരെ മോശമാണ്; ഒടുവിൽ പ്രതികരിച്ച് സായ് പല്ലവി

മലയാള സിനിമയിലൂടെ നായികയായി അരങ്ങേറ്റം കുറിച്ച് തെന്നിന്ത്യൻ സിനിമ ലോകത്ത് തന്റേതായ ഒരു സ്ഥാനം സ്വന്തമാക്കിയ നായികയാണ് സായ് പല്ലവി. മലയാളത്തിൽ വലിയൊരു ആരാധകവൃന്ദം തന്നെ സായ് പല്ലവിക്കുണ്ട്. മികച്ച കഥാപാത്രങ്ങൾ അവതരിപ്പിച്ച് സിനിമയിൽ തിളങ്ങി നിൽക്കുകയാണ് താരം. എന്നാൽ കഴിഞ്ഞ കുറച്ചു ദിവസങ്ങളായി താരം വാർത്തകളിൽ നിറയുകയാണ്. താരം വിവാഹിതയായി എന്ന തരത്തിലാണ് വാർത്തകൾ പ്രചരിക്കുന്നത്. സംവിധായകൻ രാജ്കുമാർ പെരിയസാമിയെ വിവാഹം കഴിച്ചെന്ന തരത്തിലാണ് വാർത്തകൾ.

രാജ്കുമാർ പെരിയസാമിയുടെ പുതിയ ചിത്രത്തിൽ സായ് പല്ലവിയാണ് നായിക. ശിവകാർത്തികേയൻ നായകനാകുന്ന ഈ ചിത്രത്തിന്റെ പൂജ കഴിഞ്ഞ ദിവസമാണ് നടന്നത്. പൂജയ്‌ക്ക് ശേഷം അണിയറപ്രവർത്തകർക്കൊപ്പമുള്ള ഇരുവരുടെയും ചിത്രം സമൂഹ മാദ്ധ്യമങ്ങളിൽ പോസ്റ്റ് ചെയ്തിരുന്നു. ഈ ചിത്രത്തിൽ സംവിധായകന്റെ അടത്തു നിൽക്കുന്ന സായ് പല്ലവിയുടെ ചിത്രം ക്രോപ്പ് ചെയ്താണ് ഇരുവരും വിവാഹിതരായി എന്ന തരത്തിൽ സോഷ്യൽ മീഡിയിൽ പ്രചരിക്കുന്നത്.

Honestly, I don’t care for Rumours but when it involves friends who are family, I have to speak up.
An image from my film’s pooja ceremony was intentionally cropped and circulated with paid bots & disgusting intentions.
When I have pleasant announcements to share on my work…

— Sai Pallavi (@Sai_Pallavi92) September 22, 2023

ഇപ്പോഴിതാ തന്റെ വിവാഹ വാർത്തകളോട് പ്രതികരിച്ച് താരം തന്നെ രംഗത്തെത്തിയിരിക്കുകയാണ്. സമൂഹമാദ്ധ്യമമായ എക്‌സിലൂടെയാണ് താരം തന്റെ പ്രതികരണം അറിയച്ചത്. ‘ഗോസിപ്പുകൾ പൊതുവെ ഞാനധികം ശ്രദ്ധിക്കാറില്ല. പക്ഷേ അത്തരം ഗോസിപ്പുകൾ ഞാൻ കുടുംബം പോലെ കരുതുന്ന സുഹൃത്തുക്കളെക്കുറിച്ച് കൂടിയാവുമ്പോൾ ഞാൻ സംസാരിച്ചേ മതിയാവൂ. എന്റെ പുതിയ ചിത്രത്തിന്റെ പൂജ ചടങ്ങിൽ നിന്നുള്ള ഒരു ഫോട്ടോ ക്രോപ്പ് ചെയ്ത് ബോധപൂർവ്വം പ്രചരിപ്പിക്കുകയാണ്. ഒരു പണിയുമില്ലാത്ത ഇത്തരക്കാരുടെ പ്രവർത്തികൾക്ക് മറുപടി പറയേണ്ടിവരുന്നത് നിരാശാജനകമാണ്. ഇത്തരത്തിൽ മറ്റുള്ളവരെ ബുദ്ധിമുട്ടിക്കുന്നത് വളരെ മോശമാണെന്നും സായ് പല്ലവി കുറിച്ചു.