മാനസിക സമ്മർദ്ദം അകറ്റാൻ അമിതായി ആഹാരം കഴിക്കുന്ന ചിലരെങ്കിലും കാണും. ജോലിയില് നിന്നോ മറ്റ് ജീവിതസാഹചര്യങ്ങളില് നിന്നോ ഉണ്ടാകുന്ന മാനസിക സമ്മർദ്ദം ഇത്തരത്തിൽ ആഹാരം കഴിക്കുന്നതിന് കാരണം. ഇങ്ങനെ ആഹാരം കഴിക്കുന്നതിനെ ‘സ്ട്രൈസ് ഈറ്റിംഗ് ‘ എന്നാണ് പറയുന്നത്. എന്നാൽ സ്ട്രൈസ് ഈറ്റിംഗ് ആരോഗ്യത്തിന് നല്ലതല്ലെന്നാണ് പഠനങ്ങളിൽ പറയുന്നത്.
മാനസിക സമ്മർദ്ദം അകറ്റാൻ ആഹാരം കഴിക്കുന്നത് പല തരത്തിലുള്ള ആരോഗ്യപ്രശ്നങ്ങൾക്ക് കാരണമാകും. ചിട്ടയില്ലാതെ ഭക്ഷണം കഴിക്കുന്നത് ദഹനപ്രക്രിയ, ഗ്യാസ്, അമിത വണ്ണം തുടങ്ങി നിരവധി അസുഖങ്ങൾക്ക് കാരണമാകും. ഫാസ്റ്റ് ഫുഡ് അല്ലാതെ ചില ആഹാരങ്ങൾ കഴിച്ചാൽ ഒരു പരിധി വരെ അസുഖങ്ങൾ വരാതിരിക്കാൻ സഹായിക്കും. അത്തരത്തിലെ മൂന്ന് ഭക്ഷണങ്ങൾ ഇതാ…
1. നിലക്കടല
വളരെ സാധാരണയായി നമ്മുടെ വീടുകളിൽ കാണുന്ന ഒന്നാണ് നിലക്കടല. നിരവധി ആരോഗ്യ ഗുണങ്ങളുള്ള ഒന്നാണിത്. ഇടയ്ക്കിടയ്ക്ക് നില കടല കഴിയ്ക്കുന്നത് നല്ലതാണ്. ധാരാളം പ്രോട്ടീനും ഫാറ്റും വൈറ്റമിനുകളും മിനറലുകളുമുള്ള നിലക്കടലയിൽ കാർബോഹൈഡ്രേറ്റ് വളരെ കുറവാണ്. കൂടാതെ ആന്റി ഓക്സിഡന്റുകളും നാരുകളും ഇതിൽ ധാരാളമായുണ്ട്. പൊട്ടാസ്യം, സോഡിയം, മഗ്നീഷ്യം, ഫോസ്ഫറസ്, കോപ്പർ തുടങ്ങിയവയും ഇവയിൽ അടങ്ങിയിട്ടുണ്ട്.
ധാരാളമായി നാരുകൾ അടങ്ങിയിക്കുന്നതിനാൽ നിലക്കടല കഴിക്കുന്നത് വയർ പെട്ടെന്ന് നിറയ്ക്കും, വിശപ്പും കുറയും. അതിനാൽ ശരീരഭാരം കുറയ്ക്കാനും ഇടയ്ക്കിടയ്ക്ക് ആഹാരം കഴിയ്ക്കാതിരിക്കാനും നിലക്കടല ഗുണകരമാണ്. ഫൈബർ ധാരാളം അടങ്ങിയിട്ടുളളതിനാൽ ദഹനം മെച്ചപ്പെടുത്താൻ ഇത് സഹായിക്കും. ശരീരത്തിലുടനീളം രക്തചംക്രമണം മെച്ചപ്പെടുത്താനും സഹായിക്കുന്നുണ്ട്.
2. കശുവണ്ടി
നാരുകൾ, പ്രോട്ടീൻ, ആരോഗ്യകരമായ കൊഴുപ്പുകൾ എന്നിവയാൽ സമ്പുഷ്ടമാണ് കശുവണ്ടി. നിരവധി വിറ്റാമിനുകൾ, ധാതുക്കൾ, ആരോഗ്യ സംരക്ഷണ ഗുണം ചെയ്യുന്ന സസ്യ സംയുക്തങ്ങൾ എന്നിവയും അവയിൽ അടങ്ങിയിട്ടുണ്ട്. കശുവണ്ടി ശരീരഭാരം കുറയ്ക്കാനും രക്തത്തിലെ പഞ്ചസാര നിയന്ത്രിക്കാനും ഹൃദയാരോഗ്യത്തിനും സഹായിക്കുന്നുണ്ട്.
കശുവണ്ടി കഴിക്കുന്നത് അനീമിയയുടെ സാധ്യത കുറയ്ക്കുന്നു. ഇരുമ്പിന്റെ അഭാവത്തിൽ നിന്നാണ് വിളർച്ച ഉണ്ടാകുന്നത്. ശരീരത്തിൽ ചെമ്പിന്റെ കുറവ് ഉണ്ടാകുന്നത് തടയാൻ കശുവണ്ടിപ്പരിപ്പ് പതിവായി കഴിക്കുന്നത് നല്ലതാണെന്നാണ് ആരോഗ്യവിദഗ്ധർ പറയുന്നത്. സിങ്ക്, മഗ്നീഷ്യം, ഫോസ്ഫറസ്, ഇരുമ്പ് എന്നിവ ധാരാളം കശുവണ്ടിയിൽ അടങ്ങിയിട്ടുണ്ട്.
3. ഉണക്ക തേങ്ങ
സമ്മർദ്ദം നിയന്ത്രിക്കാൻ ഉണക്ക തേങ്ങ ഏറെ സഹായിക്കുന്നു. ഉച്ച ഭക്ഷണത്തിനൊപ്പം ചട്നി ആയിട്ടോ മറ്റേതെങ്കിലും തരത്തിലോ ഇത് കഴിക്കാവുന്നതാണ്. സമ്മർദ്ദം കുറയ്ക്കുന്നതിനും ഉത്സാഹത്തോടെ ഇരിക്കാനും ഉണക്ക തേങ്ങ ഏറെ നല്ലതാണ്. കൂടാതെ ഇതിൽ, ലോറിക് ആസിഡ് അടങ്ങിയിട്ടുണ്ട്, ഇത് നിങ്ങളുടെ ചർമ്മത്തിന്റെയും മുടിയുടെയും ആരോഗ്യത്തിന് നല്ലതാണ്.
