ഹാങ്ഷോ: ഏഷ്യൻ ഗെയിംസിലെ ഇന്ത്യയുടെ ടെന്നീസ് മോഹങ്ങൾക്ക് തിരിച്ചടി. ടെന്നീസ് പുരുഷ ഡബിൾസ് ടീം രോഹൻ ബൊപ്പണ്ണ-യൂകി ഭാംബ്രി സഖ്യം രണ്ടാം റൗണ്ടിൽ തോറ്റ് പുറത്ത്. ഏഷ്യൻ ഗെയിംസിലെ ടോപ് സീഡായ ഇന്ത്യൻ സഖ്യം റാങ്കിംഗിൽ പുറകിലുളള ഉസ്ബെകിസ്താൻ സഖ്യത്തിനോടാണ് തോൽവി വഴങ്ങിയത്.
ഉസ്ബെകിസ്താന്റെ സെർജി ഫോമിൻ-ഖുമോയുൺ സുൽത്താനോവ് സഖ്യമാണ് അട്ടിമറി വിജയം നേടിയത്. മൂന്ന് സെറ്റ് നീണ്ട പോരാട്ടത്തിനൊടുവിലാണ് ഇന്ത്യൻ സഖ്യം തോൽവി വഴങ്ങിയത്. സ്കോർ: 2-6, 6-3, 10-6.
ലോകറാങ്കിംഗിൽ ആദ്യ പത്തിലുളള ബൊപ്പണ്ണയെയും ആദ്യ നൂറ് റാങ്കിലുള്ളിൽ ഉൾപ്പെടുന്ന ഭാംബ്രിയെയുമാണ് ആദ്യ 300 റാങ്കിനുള്ളിൽ പോലുമില്ലാത്ത ഉസ്ബെകിസ്താൻ ടീം പരാജയപ്പെടുത്തിയത്. കരിയറിലെ അവസാന ഏഷ്യൻ ഗെയിംസ് കളിക്കുന്ന ബൊപ്പണ്ണ 2018 ഏഷ്യൻ ഗെയിംസിൽ സ്വർണം നേടിയിരുന്നു. ബൊപ്പണ്ണയ്ക്കും ഭാംബ്രിയ്ക്കും ഇനി മിക്സഡ് ഡബിൾസ് മത്സരങ്ങൾ ശേഷിക്കുന്നുണ്ട്.
