സൗന്ദര്യ സംരക്ഷണത്തിൽ എക്കാലത്തും പ്രകൃതിദത്ത മാർഗങ്ങൾക്കാണ് നാം മുൻഗണന നൽകുന്നത്. നൂറ്റാണ്ടുകളായി സൗന്ദര്യ സംരക്ഷണത്തിലും ആരോഗ്യത്തിലും ഉപയോഗിച്ച് വരുന്ന ഒന്നാണ് കറ്റാർ വാഴ. പ്രായഭേദമന്യേ എല്ലാവർക്കും ഉപയോഗിക്കാൻ കഴിയുന്നതാണ് കറ്റാർവാഴ. ചർമ്മത്തെ ആരോഗ്യകരമായി നിലനിർത്തുന്ന ആന്റി ഓക്സിഡന്റുകളും ആന്റി ബാക്ടീരിയൽ ഘടകങ്ങളും ഇതിൽ അടങ്ങിയിരിക്കുന്നു.
എന്നാൽ കുഞ്ഞുങ്ങളിൽ കറ്റാർ വാഴ ഉപയോഗിക്കുമ്പോൾ ഏറെ സൂക്ഷിക്കേണ്ടതാണ്. കാരണം കുഞ്ഞുങ്ങളുടേത് ലോല ചർമ്മമാണ്. എന്നാൽ സുരക്ഷിതമായി ഉപയോഗിച്ചാൽ കറ്റാർവാഴ കുഞ്ഞുങ്ങളിലും ഏറെ ഗുണങ്ങൾ ചെയ്യുന്നു. കുട്ടികളിൽ സാധാരണയായി കണ്ടുവരുന്ന ചൊറിച്ചിലുകൾ, തിണർപ്പ് തുടങ്ങിയവയിൽ നിന്ന് രക്ഷ നേടാൻ കറ്റാർ വാഴയെ കൂട്ടുപിടിക്കാവുന്നതാണ്.
രാവും പകലും ഡയപ്പർ വെച്ച് കുഞ്ഞിന്റെ ശരീരത്തിൽ തിണർപ്പ് അനുഭവപ്പെടുകയും ഉറങ്ങാൻ അസ്വസ്ഥതയും അനുഭവിക്കുകയാണെങ്കിൽ കറ്റാർവാഴ ഉപയോഗിക്കാവുന്നതാണ്. തിണർപ്പ് അനുഭവപ്പെടുന്നിടത്ത് കറ്റാർ വാഴ ജെൽ പുരട്ടി കൊടുത്താൽ പ്രശ്നം പരിഹരിക്കാവുന്നതാണ്. വിറ്റാമിൻ-ഇ, അണുബാധയെ ചെറുക്കുന്ന ഘടകങ്ങളായ ബി-സിറ്റോസ്റ്റെറോൾ തുടങ്ങിയവ കറ്റാർ വാഴയിൽ അടങ്ങിയിട്ടുണ്ട്. ആന്റി ഇൻഫ്ളമേറ്ററി ഘടകങ്ങളും ധാരാളമായി ഉള്ളതിനാൽ തന്നെ ചൊറിച്ചിലിൽ നിന്നും മറ്റ് അസ്വസ്ഥകളിൽ നിന്നും രക്ഷ നൽകും. ചിലനേരത്ത് സൂര്യപ്രകാശമേറ്റ് കഴിയുമ്പോൾ കുഞ്ഞുങ്ങളുടെ ശരീരം ചുവന്ന് തടിക്കുകയും പൊള്ളലേൽക്കുകയും സാധാരണമാണ്. ഈ സാഹചര്യത്തിലും കറ്റാർ വാഴ സഹായിക്കും. ഈർപ്പത്തെ നിലനിർത്താൻ ഇതിന് കഴിയുന്നതിൽ പൊള്ളലിന്റെ ആഘാതത്തെ കുറയ്ക്കാൻ ഇതിന് കഴിയും.
