കൊച്ചി: ഐഎസ്എൽ മത്സരത്തിൽ കേരള ബ്ലാസ്റ്റേഴ്സ് താരങ്ങളുടെ കൈപിടിച്ച് കളിക്കളത്തിലേക്ക് നയിച്ചത് വനവാസി ഊരിലെ വിദ്യാർത്ഥികൾ. കഴിഞ്ഞ ദിവസം കലൂർ ജവഹർലാൽ നെഹ്റു സ്റ്റേഡിയത്തിൽ നടന്ന കേരള ബ്ലാസ്റ്റേഴ്സ് എഫ് സി-ജംഷഡ്പൂർ മത്സരത്തിലാണ് താരങ്ങളെ ഗ്രൗണ്ടിലേക്കു കൈപിടിച്ച് ആനയിക്കാൻ മലമ്പുഴ ആശ്രമം സ്‌കൂളിലെ കുട്ടികൾ കൊച്ചിയിൽ എത്തിയത്. അട്ടപ്പാടി പറമ്പിക്കുളം, നെന്മാറ, തളികക്കല്ല്, മണ്ണാർക്കാട്, അമ്പലപ്പാറ മേഖലകളിലെ വിദ്യാർത്ഥികളാണ് ഇവർ. മത്സരത്തിൽ ബ്ലാസ്റ്റേഴ്സ് എതിരില്ലാത്ത ഒരു ഗോളിന് ജയിച്ചിരുന്നു.
‘ആരാലും ശ്രദ്ധിക്കപ്പെടാത്ത കേരളത്തിലെ പട്ടികവർഗ്ഗ വിഭാഗത്തിലുള്ള കുട്ടികളെ ചേർത്തുപിടിക്കുകയാണ് കേരളാ ബ്ലാസ്റ്റേഴ്സ്. ഏഷ്യയിൽ ഏറ്റവും കൂടുതൽ ആരാധകരുള്ള കേരളാ ബ്ലാസ്റ്റേഴ്സ് പോലുള്ള ക്ലബ്ബിന്റെ താരങ്ങൾക്കൊപ്പം ഞങ്ങളുടെ കുട്ടിൾ കൈപിടിച്ച് നടന്നത് സ്വപ്നതുല്യമായ നേട്ടമാണ്’- എന്ന് പട്ടിക വികസന വകുപ്പിന്റെയും എറണാകുളം ജില്ലയുടെയും ട്രൈബൽ എക്സ്റ്റൻഷൻ ഓഫീസർ അനൂപ് ആർ പറഞ്ഞു. മത്സരവേദിയിൽ പട്ടിക ജാതി, പട്ടികവർഗ മന്ത്രി കെ. രാധാകൃഷ്ണൻ മുഖ്യാതിഥിയായിരുന്നു.
അതേസമയം വെള്ളിയാഴ്‌ച്ചയാണ് സ്‌കൂൾ പ്രിൻസിപ്പാളിനും അദ്ധ്യാപകർക്കുമൊപ്പം ഇരുപത്തിരണ്ട് വിദ്യാർത്ഥികൾ കൊച്ചിയിൽ എത്തിയത്. മെട്രോ യാത്രയും നഗരകാഴ്ചകളും വിവിധ രുചികളുമൊക്കെ ആസ്വദിച്ച ശേഷമാണ് കുട്ടികൾ മലമ്പുഴയിലേക്ക് മടങ്ങിയത്.
