ഹാങ്ചോ: ഏഷ്യൻ ഗെയിംസ് അത്ലറ്റിക്സ് വിഭാഗത്തിൽ ഇന്ത്യക്ക് വീണ്ടും മെഡൽ. മലയാളി താരം ആൻസി സോജനാണ് ലോംഗ്ജമ്പിൽ വെളളി മെഡൽ സ്വന്തമാക്കിയത്. കരിയറിലെ ഏറ്റവും മികച്ച ദൂരമായ 6.68 മീറ്റർ ചാടിയാണ് താരം ഏഷ്യൻ ഗെയിംസിൽ രാജ്യത്തിനായി മെഡൽ നേടിയത്. തന്റെ കരിയറിലെ മികച്ച പ്രകടനമാണ് താരം കാഴ്ചവെച്ചത്.
6.73 ദൂരം ചാടിയ ചൈനീസ് താരത്തിനാണ് സ്വർണം. ഫൈനലിൽ പങ്കെടുത്ത മറ്റൊരു ഇന്ത്യൻ താരമായ ശൈലി സിംഗ് 5-ാം സ്ഥാനത്തെത്തി. 6.48 മീറ്ററായിരുന്നു താരത്തിന്റെ മികച്ച നേട്ടം.
ആദ്യ ശ്രമത്തിൽ 6.13 മീറ്റർ പിന്നിട്ട താരം 5-ാം ശ്രമത്തിലാണ് മികച്ച ദൂരം കണ്ടെത്തിയത്. 6.49, 6.56, 6.30 എന്നിങ്ങനെയാണ് താണ്ടിയ ദൂരം. തൃശൂർ നാട്ടിക സ്വദേശിയാണ് ആൻസി.