ഹാങ്ചോ : ഏഷ്യൻ ഗെയിംസിൽ പങ്കെടുത്ത് മടങ്ങിയെത്തിയ മെഡൽ ജേതാക്കളുടെ രണ്ടാം ബാച്ചിനെ കേന്ദ്ര കായിക മന്ത്രി അനുരാഗ് ഠാക്കൂർ അനുമോദിച്ചു. ഗെയിംസിൽ ഇന്ത്യ ഇതുവരെ നേടിയ 59 മെഡലുകളിൽ 22 മെഡലുകളും നേടിയ ഷൂട്ടർമാർ രണ്ടാം ബാച്ചിൽ ഉണ്ടായിരുന്നു. ഏഴ് സ്വർണവും ഒമ്പത് വെള്ളിയും ആറ് വെങ്കലവുമാണ് ഷൂട്ടർമാർ നേടിയത്. ടെന്നീസ്, സെയിലിംഗ്, വുഷു എന്നിവയിൽ നിന്ന് മെഡൽ നേടിയവരും ആദരിക്കപ്പെട്ട ടീമിൽ ഉണ്ടായിരുന്നു.
ഏഷ്യൻ ഗെയിംസിൽ ഏറ്റവും കൂടുതൽ മെഡലുകൾ നേടിയതിന് ഷൂട്ടിംഗ് ഫെഡറേഷനെ അഭിനന്ദിക്കുന്നു. 2002-ൽ ഷൂട്ടിംഗിൽ രണ്ട് മെഡലുകൾ മാത്രമാണ് നേടാനായത്. എന്നാൽ ഇപ്പോൾ 22 മെഡൽ നേടിയെന്ന് കേന്ദ്ര കായിക മന്ത്രി പറഞ്ഞു.
2018-ൽ ജക്കാർത്തയിൽ 70 മെഡലുകൾ നേടിയ സ്ഥാനത്ത് ഇന്ത്യ 100 മെഡലുകളാണ് ലക്ഷ്യമിടുന്നത്. അഞ്ച് ദിവസം കൂടി കഴിഞ്ഞ് ഏഷ്യൻ ഗെയിംസ് അവസാനിക്കുമ്പോൾ, ഇന്ത്യ എക്കാലത്തെയും മികച്ച നേട്ടം കൈവരിക്കുമെന്ന് അദ്ദേഹം ആത്മവിശ്വാസം പ്രകടിപ്പിച്ചു. പരിശീലകരോടും ഫെഡറേഷനോടും നന്ദിയുണ്ടെന്നും താരങ്ങൾ അറിയിച്ചു.