സാംസങ് ഗാലക്സി എസ്23 എഫ്ഇ സ്മാർട്ഫോൺ ഇന്ന് ആഗോള വിപണിയിൽ അവതരിപ്പിച്ചു. കൂടാതെ ഗാലക്സി ടാബ് എസ്9 എഫ്ഇയും ഇതിനൊപ്പം തന്നെ അവതരിപ്പിച്ചിട്ടുണ്ട്. ഒരു സ്റ്റോറേജ് വേരിയന്റ് മാത്രമുള്ള പുതിയ സീരീസ് ഈ മാസം അവസാനത്തോടെ വിൽപ്പനയ്ക്കെത്തുമെന്നാണ് വിലയിരുത്തൽ. ഗാലക്സി എസ് 21 എഫ്ഇയുടെ പിൻഗാമിയാണ് ഇത്.
ഏകദേശം 49,800 രൂപയാണ് വിപണിയിലെത്തുമ്പോഴുള്ള വിലയെന്ന റിപ്പോർട്ടുകളാണ് പുറത്തു വരുന്നത്. സാംസങ് വെബ്സൈറ്റിൽ പ്രദർശിപ്പിച്ചിട്ടുള്ള ഫോണിന് എട്ട് ജിബി റാമും 256 ജിബി സ്റ്റോറേജുമാണ് ഉള്ളത്. ക്രീം, ഗ്രാഫൈറ്റ്, മിന്റ്, പർപ്പിൾ എന്നീ നിറങ്ങളിലാകും ഫോൺ വിൽപ്പനയ്ക്കെത്തുക. സാംസങ് വെബ്സൈറ്റിൽ മാത്രമായി ഇൻഡിഗോ, ടാംഗറിൻ നിറങ്ങളിലും ഫോൺ വിൽപ്പനയ്ക്കെത്തും. ഒക്ടോബർ 26 മുതലാകും പുതിയ സീരീസിന്റെ വിൽപ്പന ആരംഭിക്കുക.
സാംസങ് ഗാലക്സി എസ്23 എഫ്ഇയുടെ സവിശേഷതകൾ ഇവയൊക്കെ…
6.4 ഇഞ്ച് ഡൈനാമിക് ഫുൾ എച്ച്ഡി+ അമോലെഡ് 2 എക്സ് ഡിസ്പ്ലേയിൽ 120 ഹെർട്സ് വരെയും റിഫ്രഷ് റേറ്റുണ്ട്. 2.8 ഗിഗാഹെർട്സ് ഒക്ടാകോർ പ്രൊസസറാണ് ഇതിലുള്ളത്. ക്വാൽകോം സ്നാപ്ഡ്രാഗൺ എട്ട് ജെൻ 1 പ്രൊസസറോ എക്സിനോസ് 2,200 ചിപ്പോ ആയിരിക്കും ഇതിലുണ്ടാകുക എന്നാണ് സൂചന.
ട്രിപ്പിൾ റിയർ ക്യാമറയിൽ ഒഐഎസ് സംവിധാനമുള്ള 50 എംപി സെൻസർ, 12 എംപി അൾട്രാ വൈഡ് സെൻസർ, എട്ട് മെഗാപിക്സൽ ടെലിഫോട്ടോ എന്നിവയാണുള്ളത്. പഞ്ച്ഹോൾ ക്യാമറയിൽ 10 എംപി ഫ്രണ്ട് ക്യാമറയാണ് ഉള്ളത്.
