മലയാള സിനിമാ പ്രേമികൾ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് സുരേഷ് ഗോപി നായകനാകുന്ന ഗരുഡൻ. നവാഗതനായ അരുൺ വർമ്മ സംവിധാനം ചെയ്യുന്ന ചിത്രത്തിന്റെ റിലീസ് സംബന്ധിച്ചുള്ള വിവരങ്ങൾ പുറത്തു വിട്ടിരിക്കുകയാണ് അണിയറ പ്രവർത്തകർ. സിനിമ നവംബറിൽ തിയറ്ററുകളിലെത്തുമെന്നാണ് അറിയിച്ചിരിക്കുന്നത്. ഇതുമായി ബന്ധപ്പെട്ട് പുതിയ ഒരു പോസ്റ്ററും പുറത്തിറക്കിയിട്ടുണ്ട്. സുരേഷ് ഗോപിക്കും സിനിമയുടെ അണിയറ പ്രവർത്തകർക്കും ആശംസകൾ അറിയിച്ച് ഉണ്ണിമുകുന്ദൻ, പൃത്ഥ്വിരാജ്, ടൊവിനോ തോമസ് തുടങ്ങി നിരവധി താരങ്ങളും സിനിമയുടെ പോസ്റ്റർ സമൂഹമാദ്ധ്യമങ്ങളിൽ പങ്കുവെച്ചു.
നിയമ പോരാട്ടത്തിന്റെ കഥ പറയുന്ന ലീഗൽ ത്രില്ലർ ജോണറിൽപ്പെടുന്ന ഗരുഡന്റെ മറ്റൊരാകർഷണം ബിജു മോനോൻ കൂടിയാണ്. നീണ്ട വർഷങ്ങൾക്ക് ശേഷമാണ് സുരേഷ് ഗോപി- ബിജു മോനോൻ കൂട്ടുക്കെട്ട് വീണ്ടും ഒന്നിക്കുന്നത്. നവംബറിൽ റിലീസ് എന്ന് അറിയിച്ചിട്ടുണ്ടെങ്കിലും കൃത്യമായ തീയതി ഇതുവരെയും പ്രഖ്യാപിച്ചിട്ടില്ല. ഓഗസ്റ്റിലാണ് സിനിമയുടെ ചിത്രീകരണം പൂർത്തിയായത്. ഹൈദരാബാദ്, കൊച്ചി എന്നിവിടങ്ങളിലായിരുന്നു ചിത്രത്തിന്റെ ഷൂട്ട്. മൂന്ന് ഷെഡ്യൂളുകളിലായി 75 ദിവസത്തോളമായിരുന്നു ചിത്രീകരണം.
കഴിഞ്ഞ ദിവസം സിനിമയിലെ തന്റെ ഡംബ്ബിംഗും സുരേഷ് ഗോപി പൂർത്തിയാക്കിയിരുന്നു. സുരേഷ് ഗോപിയുടെയും ബിജു മേനോന്റെയും കഥാപാത്രങ്ങളുടെ നിയമപോരാട്ടത്തിന്റെ അങ്കം കുറിക്കുന്ന ഗരുഡൻ എന്ന ചിത്രം പ്രേക്ഷകർക്ക് ഉദ്വേഗത്തിന്റെ പുതിയ ദൃശ്യാനുഭവം നൽകുമെന്ന് ഉറപ്പാണ്. സുരേഷ് ഗോപിക്കൊപ്പം സിദ്ദിഖും ജഗദീഷും ഒന്നിക്കുന്നു എന്ന പ്രത്യേകതയും ഈ ചിത്രത്തിനുണ്ട്.
