കോമഡി വേഷങ്ങളിലൂടെ ആരാധകരുടെ പ്രിയ താരമായിമാറിയ നടനായിരുന്നു സൂരി. വളരെ കഷ്ടപ്പെട്ട് സിനിമയിൽ എത്തിയ സൂരി പിൽക്കാലത്ത് തെന്നിന്ത്യൻ സിനിമയിൽ മാറ്റി നിർത്താൻ കഴിയാത്ത ഘടകമായി മാറി. തമിഴിലെ മിക്ക നായകൻമാർക്കൊപ്പവും സൂരി ഒരു കോംമ്പോ തന്നെ ഉണ്ടാക്കി. തുടക്ക കാലത്ത് ജൂനിയർ ആർട്ടിസ്റ്റായി എത്തിയ സൂരിക്ക് തമിഴ് സിനിമയിൽ ഒരു ഇടം നൽകിയത് വെണ്ണില കബഡി കുഴു എന്ന ചിത്രത്തിലെ വേഷമായിരുന്നു. പിന്നീട് വെട്രിമാരൻ ചിത്രത്തിലൂടെ നായകനായും അരങ്ങേറി. സീരിയസായ ഒരു കഥാപാത്രം വളരെ മനോഹരമായാണ് സൂരി കൈകാര്യം ചെയ്തത്.
താര ജാഡകൾ ഒട്ടുമില്ലാത്ത നടനാണ് സൂരിയെന്ന് നിസംശയം പറയാം. സാമൂഹിക പ്രശ്നങ്ങളിലും സൂരി മടിച്ച് നിൽക്കാതെ ഇടപെടാറുണ്ട്. സാധാരണക്കാർക്കിടയിൽ സാധാരണക്കാരനായി നിൽക്കാൻ സൂരിക്ക് കഴിയാറുണ്ടെന്നതും അദ്ദേഹത്തിന്റെ സവിശേഷതയാണ്. അതിന് ഏറ്റവും വലിയ ഉദഹാരണമാണ് ഇപ്പോൾ സമൂഹമാദ്ധ്യമങ്ങളിൽ പ്രചരിക്കുന്ന വീഡിയോ.
படப்பிடிப்பில், மகிழ்வித்து மகிழ்ந்த தருணம்❤️❤️🤗 pic.twitter.com/ye1hRiYB3A
— Actor Soori (@sooriofficial) October 6, 2023
തന്റെ പുതിയ സിനിമയുടെ ചിത്രീകരണത്തിനായി ഒരു ഗ്രാമത്തിലെത്തിയതായിരുന്നു സൂരി. പ്രദേശവാസികളായ ഒരു കൂട്ടം കുട്ടികൾ സൂരിയെ കാണാനെത്തി. ചിത്രീകരണത്തിന് മുന്നോടിയായി മേക്കപ്പ് ചെയ്യുകയായിരുന്ന സൂരിയെ ഏറെ നേരം കുട്ടികൾ കാത്തുനിൽക്കുകയും ചെയ്തു. ഒടുവിൽ കാരവാനിൽ നിന്ന് പുറത്തുവന്ന സൂരിയെ കണ്ട് കുട്ടികൾക്ക് ആവേശമായി. തന്റെ കുട്ടി ആരാധകരോട് സൂരി ഏറെ നേരെ വർത്തമാനം പറയുകയും സുഖാന്വേഷണങ്ങൾ തിരക്കുകയും ചെയ്തു.
ഇഷ്ടതാരത്തെ നേരിൽ കണ്ടപ്പോൾ കുട്ടികൾ തങ്ങളുടെ ഒരു വലിയ ആഗ്രഹം സൂരിയോട് തുറന്നു പറഞ്ഞു. കാരവനിൽ കയറണം. ‘അണ്ണാ ഒരേയൊരു വാട്ടി..’എന്ന് പറഞ്ഞ് താരത്തിന്റെ മുന്നിൽ അഭ്യർഥനയോടെ നിന്ന കുട്ടികളെ നിരാശരാക്കാതെ സൂരി അവരെ കാരവാനിലേക്ക് ക്ഷണിച്ചു.. വളരെ കൗതുകത്തോടെ കാരവാൻ കാണാനായി കുട്ടികൾ തിരക്ക് കൂട്ടി. ഒരു വലിയ സ്വപ്നം സഫലമായതിന്റെ സന്തോഷത്തിലായിരുന്നു കുട്ടികൾക്ക്. കാരവാനിൽ നിന്ന് പുറത്തെത്തിയപ്പോൾ കുട്ടികളോട് സൂരി സ്നേഹത്തോടെ ‘നന്നായി പഠിക്കണം’ എന്നും പറഞ്ഞു.
