പണം ഇല്ലാതെ ഇന്നത്തെ കാലത്ത് ജീവിക്കാൻ സാധിക്കില്ലെന്ന് നമുക്ക് അറിയാം. എന്തിനു ഏതിനും പണമാണ് ആവശ്യമായി വരുന്നത്. ഇവയുടെ മൂല്യത്തിൽ വരുന്ന വ്യത്യാസത്തിൽ കറൻസികളെ ഏറ്റവും മൂല്യമുള്ള കറൻസികളായും മൂല്യം കുറഞ്ഞ കറൻസികളായും വേർതിരിച്ചിട്ടുണ്ട്. മൂല്യം കൂടിയ കറൻസികൾ പലപ്പോഴും നാം ശ്രദ്ധിച്ചിട്ടുണ്ടാവും. മൂല്യം കുറഞ്ഞ വിവിധ രാജ്യങ്ങളിലെ കറൻസികളെ കൂടി പരിചയപ്പെടാം..
ഇറാനിയൻ റിയാൽ:
ഒരു ഇന്ത്യൻ രൂപ 508.53 ഇറാനിയൻ റിയാലിന് തുല്യമാണ്. ലോകത്തിലെ ഏറ്റവും വില കുറഞ്ഞ കറൻസിയാണിത്.
ആണവ പരീക്ഷണത്തെ തുടർന്ന് ഇറാനെതിരെ വിവിധ രാജ്യങ്ങൾ ഏർപ്പെടുത്തിയ ഉപരോധവും, ഇറാൻ-ഇറാഖ് യുദ്ധങ്ങളുമാണ് ഇതിന്റെ മൂല്യം കുറയാൻ കാരണം.
വിയറ്റ്നാമീസ് ഡോംഗ്:
ഒരു ഇന്ത്യൻ രൂപ 286.53 വിയറ്റ്നാമീസ് കറൻസിക്ക് തുല്യമാണ്. കേന്ദ്രീകൃത സമ്പദ്വ്യവസ്ഥയിൽ നിന്നും വിപണി സമ്പദ്വ്യവസ്ഥയിലേക്ക് മാറുന്നതാണ് ഈ കറൻസിയുടെ മൂല്യ തകർച്ചയ്ക്ക് കാരണം.
സിയറ ലിയോണിയൻ ലിയോൺ
ആഫ്രിക്കൻ രാജ്യമായ സിയറ ലിയോണിന്റെ കറൻസിയാണ് ലിയോൺ. ഇന്ത്യയുടെ ഒരു രൂപയ്ക്ക് തുല്യമാണ് 237.59 സിയറ ലിയോണിയൻ ലിയോൺ. ദാരിദ്ര്യം, അഴിമതി, യുദ്ധങ്ങൾ തുടങ്ങിയ നിരവധി കാരണങ്ങളാണ് കറൻസിയുടെ മൂല്യം കുറയാൻ കാരണം.
ലാവോ / ലാവോഷ്യൻ കിപ്
1 ഇന്ത്യൻ രൂപ 232.94 ലാവോഷ്യൻ കറൻസിക്ക് തുല്യമാണ്. 1952-ൽ ഈ കറൻസി നിലവിൽ വന്നതു മുതൽ ഇതിന്റെ മൂല്യം കുറവായിരുന്നു. കാലക്രമേണ ഇത് വർദ്ധിക്കുകയായിരുന്നു.
ഇന്തോനേഷ്യൻ റുപ്പിയ
1 ഇന്ത്യൻ രൂപ 184 ഇന്തോനേഷ്യൻ റുപ്പിയയ്ക്ക് തുല്യമാണ്. വർഷങ്ങളായി ഇന്തോനേഷ്യൻ റുപ്പിയ മൂല്യ തകർച്ചയുടെ വക്കിലാണ്. സെൻട്രൽ ബാങ്ക് പ്രശ്നങ്ങളും ചരക്കുകളുടെ കയറ്റിറക്കുമതികളിൽ നേരിടുന്നപ്രശ്നങ്ങളുമാണ് മൂല്യ തകർച്ചക്കു കാരണം.