ഝജ്ജാർ: കേരളത്തിൽ അംഗീകാരത്തിനായി താരങ്ങൾ യാചിക്കുമ്പോൾ ഏഷ്യൻ ഗെയിംസ് ജേതാവിന് സ്വീകരണമൊരുക്കി ഹരിയാനയിലെ ഗ്രാമം. ഏഷ്യൻ ഗെയിംസിൽ സ്വർണം നേടിയ വനിതാ വിഭാഗം കബഡി ടീമിലെ അംഗം പ്രിയങ്ക പിലാനിയയ്ക്കാണ് സ്വന്തം നാട് സ്വീകരണമൊരുക്കിയത്. റോഡ് ഷോ നടത്തിയാണ് ഗുലിയ ഖാപ് ഗ്രാമത്തിലേക്ക് രാജ്യത്തിന്റെയും നാടിന്റെയും അഭിമാനമായ താരത്തെ ജനങ്ങൾ സ്വീകരിച്ചത്.
നിങ്ങളൊരുക്കിയ സ്വീകരണത്തിന് നന്ദി. ഇനിയും രാജ്യത്തിനായി ഞങ്ങൾ മെഡൽ നേടും. ഈ നേട്ടത്തിന് പിന്നിൽ നിങ്ങളെവരുടെയും പിന്തുണയും കാഴ്ചപ്പാടുമുണ്ട്. ഈ പിന്തുണ ഒരിക്കലും നിങ്ങൾ അവസാനിപ്പിക്കരുത്. കാരണം വളർന്നു വരുന്ന തലമുറയ്ക്കും ഈ പിന്തുണ ലഭിച്ചാൽ അവരും നേട്ടങ്ങൾ കൈവരിക്കും. ലോക കിരീടത്തിൽ മുത്തമിട്ട് രാജ്യത്തിന്റെ യശസ് ഉയർത്തുകയാണ് ലക്ഷ്യമെന്നും താരം പറഞ്ഞു.
ഏഷ്യൻ ഗെയിംസിൽ വാശിയേറിയ പോരാട്ടത്തിലാണ് ഇന്ത്യൻ വനിതകൾ കബഡിയിൽ ചൈനീസ് തായ്പേയിയെ തോൽപ്പിച്ചത്. ഏഷ്യൻ ഗെയിംസ് കബഡി ചരിത്രത്തിലെ വനിതകളുടെ മൂന്നാം സ്വർണമായിരുന്നു ഇത്.