ഇന്ന് ക്രെഡിറ്റ് കാർഡ് ഉപയോക്താക്കൾ അല്ലാത്തവർ ചുരുക്കമായിരിക്കും. ജോലി കിട്ടിയതിന് പിന്നാലെ പലരും നോട്ടം വെക്കുന്നത് ക്രെഡിറ്റ് കാർഡിലേക്കാണ്. ഉപയോക്താക്കൾക്ക് വിവിധ ഇടപാടുകളിലൂടെ ലഭിക്കുന്ന ഇളവുകളും റിവാർഡുകളും ക്രെഡിറ്റ് കാർഡ് സ്വന്തമാക്കാനുള്ള പ്രധാന കാരണമാണ്. കൂടാതെ ഭവന വായ്പ എടുക്കാൻ പദ്ധതിയിടുന്നവർക്ക് മികച്ച ക്രെഡിറ്റ് സ്കോർ ഉണ്ടാക്കിയെടുക്കാനുള്ള എളുപ്പവഴിയാണ് ക്രെഡിറ്റ് കാർഡ് ഉപയോഗം. എന്നാൽ ഒരു ക്രെഡിറ്റ് കാർഡ് സ്വന്തമാക്കുന്നതിന് നിരവധി വെല്ലുവിളികളാണ് ഉള്ളത്. ഇവ എന്തെല്ലാമെന്ന് നോക്കാം.
മുമ്പ് ക്രെഡിറ്റ് കാർഡ് ഉപയോഗിക്കാത്തവരാണ് നിങ്ങളെങ്കിൽ പുതിയ ക്രെഡിറ്റ് കാർഡ് ലഭിക്കുന്നതിന് സാലറി അക്കൗണ്ടുള്ള ബാങ്കാണ് ഉചിതം. ബാങ്കിൽ അന്വേഷിച്ച് മികച്ച റിവാർഡുകളുള്ള കാർഡ് തിരഞ്ഞെടുക്കാവുന്നതാണ്. അപേക്ഷകർ ജോലി ചെയ്യുന്ന കമ്പനിയുമായി മികച്ച ബന്ധം പുലർത്തുന്നു എന്നതിനാൽ തന്നെ അപേക്ഷകന്റെ ശമ്പള നിലവാരവും സാമ്പത്തിക പ്രൊഫൈലും ബാങ്കിന് പരിശോധിക്കാൻ സാധിക്കും. സാലറി അക്കൗണ്ടിൽ നിന്നാണ് ചിലവാക്കുന്നത് എന്നതിനാൽ എന്നതിനാൽ തന്നെ അപേക്ഷകന്റെ ചിലവാക്കൽ രീതിയെക്കുറിച്ചുള്ള ധാരണയും ലഭിക്കുന്നു. ഇത് ക്രെഡിറ്റ് കാർഡ് എളുപ്പത്തിൽ കിട്ടാൻ സഹായിക്കുന്നു.
കുറഞ്ഞ ക്രെഡിറ്റ് സ്കോർ ആണെന്നതിനാൽ ബാങ്ക് അപേക്ഷ നിരസിക്കാറുണ്ട്. മികച്ച കാർഡ് ലഭിക്കുന്നതിനായി ക്രെഡിറ്റ് സ്കോർ ഉയർത്തേണ്ടതുണ്ട്. ബാങ്കിൽ സ്ഥിര നിക്ഷേപമിട്ട് ഈ ഗ്യാരണ്ടിയിൽ ക്രെഡിറ്റ് കാർഡ് സ്വന്തമാക്കാം. റിവാർഡ് പോയിന്റുകളും ക്യാഷ്ബാക്ക് ഓഫറുകളും ഇത്തരം കാർഡുകളിൽ കൂടുതലായിരിക്കും. സ്ഥിരനിക്ഷേപത്തിനെതിരെ ക്രെഡിറ്റ് സ്കോർ എടുത്ത് കൃത്യസമയത്ത് ബില്ലുകൾ അടക്കുകയാണെങ്കിൽ ഇത് ക്രെഡിറ്റ് സ്കോർ ഉയർത്തും. ക്രെഡിറ്റ് കാർഡ് ബിൽ തുക കൃത്യസമയത്ത് തിരിച്ചടയ്ക്കാൻ സാധിച്ചില്ലെങ്കിൽ ബാങ്കുകൾ സ്ഥിര നിക്ഷേപത്തിൽ നിന്നും തുക ഈടാക്കുന്നതായിരിക്കും.
