ബോളിവുഡിലെ മെഗാസ്റ്റാർ അമിതാഭ് ബച്ചന്റെ 81 -ാം പിറന്നാൾ ആഘോഷമാക്കി ആരാധകലോകവും ചലച്ചിത്ര ലോകവും. ഇന്നലെയായിരുന്നു ബച്ചന്റെ ജന്മദിനം. നിരവധി ആരാധകരാണ് അദ്ദേഹത്തെ കാണാൻ വേണ്ടി മുംബൈയിലെ ജൽസയിലെ വസതിക്ക് മുമ്പിൽ എത്തിച്ചേർന്നത്. ആരാധകരെ നേരിട്ട് കണ്ട ബച്ചൻ ആശംസകൾക്ക് നന്ദി അറിയിക്കുകയും ചെയ്യ്തു.
അമിതാഭ് ബച്ചന്റെ പിറന്നാളിനോട് അനുബന്ധിച്ച് ആദ്ദേഹത്തിന്റെ ഏറ്റവും പുതിയ ചിത്രമായ കൽക്കിയുടെ ക്യാരക്ടർ പോസ്റ്റർ അണിയറ പ്രവർത്തകർ പുറത്തിറക്കിയിരുന്നു. സയൻസ് ഫിക്ഷൻ വിഭാഗത്തിൽ വരുന്ന ചിത്രം 2024 ഫെബ്രുവരി 24 ന് തിയേറ്ററുകളിൽ എത്തും.
ബോളിവുഡിൽ എന്നും വിജയങ്ങൾ മാത്രം നൽകിയിട്ടുള്ള ബച്ചൻ ധാരാളം വേഷപകർച്ചകളിലൂടെ ആരാധകരെ അമ്പരപ്പിച്ചിട്ടുണ്ട്. 1969 ൽ ഇന്ത്യൻ സിനിമാ ലോകത്തേക്ക് കടന്ന് വന്ന അദ്ദേഹം തന്റെ അഭിനയ മികവ് കൊണ്ട് വളരെ പെട്ടെന്ന് തന്നെ ആരാധകരെ സൃഷ്ടിച്ചെടുത്തു. എന്നും കാഴ്ചക്കാരന്റെ മനസ്സിൽ പതിയുന്ന ഒരുപിടി കഥാപാത്രങ്ങളിലൂടെ അദ്ദേഹം ചലച്ചിത്ര ലോകത്തെ ജൈത്ര യാത്ര തുടർന്നു. എന്നാൽ വിജയപാതയിൽ നിന്നും അടിപതറിയപ്പോഴും അദ്ദേഹം തന്റെ ആത്മവിശ്വാസം കൈവിട്ടിരുന്നില്ല. ടെലിവിഷൻ ഷോകളിലൂടെയും സിനിമകളിലൂടെയും അമിതാഭ് ബച്ചൻ എന്ന ഇന്ത്യൻ സിനിമയുടെ ബിഗ് ബി വിജയകുതിപ്പിലേക്ക് തിരിച്ചെത്തി.
