ലോകമെങ്ങും ആരാധകരുള്ള താരമാണ് തെന്നിന്ത്യൻ സൂപ്പർ സ്റ്റാർ രജനീകാന്ത്. സ്റ്റെെൽ മന്നന്റെ നടപ്പിലും എടുപ്പിലുമെല്ലാം ഉണ്ടാകുന്ന സ്റ്റെെലിനും തലൈവരുടെ സ്വഭാവ സവിശേഷതയ്ക്കും ആരാധകർ ഏറെയാണ്. രജനികാന്തിനെ തമിഴകത്തെ സൂപ്പര്താരമാക്കി മാറ്റിയതും ഈ മാനറിസങ്ങളാണ്. ഇതിനകം 160ഓളം ചിത്രങ്ങളിൽ രജനീകാന്ത് അഭിനയിച്ചു കഴിഞ്ഞു. എന്നാൽ തമിഴിൽ മാത്രമല്ല മലയാളം, ഹിന്ദി, തെലുങ്ക്, കന്നഡ, ബംഗാളി ചിത്രങ്ങളിലും പുലിയായിരുന്നു താരം.
മലയാളത്തിൽ നടൻ അരങ്ങ് തകർത്തത് 1979-ൽ പുറത്തിറങ്ങിയ ‘അലാവുദ്ദീനും അത്ഭുതവിളക്കും’ എന്ന ചിത്രത്തിലാണ്. ഈ ചിത്രത്തിലൂടെ തന്നെയാണ് രജനീകാന്ത് മലയാള സിനിമയിൽ അരങ്ങേറ്റം കുറിച്ചതും. ഐ. വി. ശശി സംവിധാനം ചെയ്ത ചിത്രം വൻ വിജയമായിരുന്നു. കമറുദ്ദീൻ എന്ന മാസ് കഥാപാത്രമായിരുന്നു രജനീകാന്ത്. ഇപ്പോഴിതാ ചിത്രത്തിലെ രജനീകാന്തിന്റെ ഇൻട്രോ സീൻ വർഷങ്ങൾക്കിപ്പുറം സോഷ്യൽ മീഡിയയിൽ വൈറലാവുകയാണ്. രജനീകാന്തിന് മലയാള സിനിമയിൽ ലഭിച്ച മികച്ച ഇൻട്രോ സീൻ എന്ന തലക്കെട്ടോടെയാണ് ഈ വീഡിയോ വെെറലാകുന്നത്.
രജനീകാന്തിനെ കൂടാതെ കമൽ ഹാസൻ, ജയഭാരതി, ശ്രീപ്രിയ, ജെമിനി ഗണേശൻ, എസ്. എ. അശോകൻ, ജോസ് പ്രകാശ്, ടിപി മാധവൻ, ശങ്കരാടി, സുകുമാരി, തിക്കുറുശ്ശി സുകുമാരൻ, അടൂർ ഭാസി, ബഹദൂർ, ശ്രീലത നമ്പൂതിരി എന്നിങ്ങനെ വലിയൊരു താരനിര തന്നെ ആ മൾട്ടി സ്റ്റാറർ ചിത്രത്തിനായി കൈകോർത്തു. അലാവുദ്ദീന്റെ വേഷമായിരുന്നു കമൽ ഹാസന് ലഭിച്ചത്.