യാത്രക്കാർക്ക് മികച്ച സേവനങ്ങൾ നൽകുന്നതിൽ പ്രതിജ്ഞാബദ്ധമാണ് ഇന്ത്യൻ റെയിൽവേ. ഇതിന്റെ ഭാഗമായി ആരോഗ്യവും ശുചിത്വവുമുള്ള ഭക്ഷണം ഉറപ്പാക്കാൻ നടപടി സ്വീകരിച്ചിരിക്കുകയാണ്. ട്രെയിൻ യാത്രയിൽ അനധികൃത ഭക്ഷണ വിതരണക്കാരെ ഒഴിവാക്കണമെന്ന് ഇന്ത്യൻ റെയിൽവേ കാറ്ററിംഗ് ആൻഡ് ടൂറിസം കോർപ്പറേഷൻ (ഐആർസിടിസി) മുന്നറിയിപ്പ് നൽകിയിട്ടുണ്ട്.
ട്രെയിനിൽ ഭക്ഷണ വിതരണം നടത്തുന്ന അനധികൃത വെബ്സൈറ്റുകളുടെ പട്ടിക ഐആർസിടിസി പുറത്തുവിട്ടു. ഇത് പ്രകാരം റെയിൽറെസ്ട്രോ, റെയിൽമിത്ര, ട്രാവൽഖാന, റെയിൽമീൽ, ഡിബ്റെയിൽ, ഖാനാഓൺലൈൻ, ട്രെയിൻസ് കഫേ, ട്രെയിൻ മെന്യു, ഫൂഡ് ഓൺ ട്രാക്ക്, ഇകാറ്ററിംഗ് ആപ്പ് എന്നീ ഭക്ഷണ വിതരണ വെബ്സൈറ്റുകളിൽ നിന്ന് ഭക്ഷണം വാങ്ങുന്നത് ഒഴിവാക്കണം എന്നാണ് നിർദ്ദേശം.
യാത്രക്കാർക്ക് ഇഷ്ടമുള്ള റെസ്റ്റോറന്റിൽ നിന്ന് ഭക്ഷണം ഓർഡർ ചെയ്യാനുള്ള അവസരവും റെയിൽവേ ഒരുക്കുന്നുണ്ട്. ഇതിനായി ഇ-കാറ്ററിംഗ് എന്ന പേരിൽ സംവിധാനവും തയ്യാറാക്കിയിട്ടുണ്ട്. ഈ സംവിധാനം വഴി യാത്രക്കാർക്ക് ഇഷ്ടമുള്ള റെസ്റ്ററന്റിലെ ഭക്ഷണം ഓർഡർ ചെയ്യാനാകും. ഇതിനായി www.ecatering.irctc.co.in അല്ലെങ്കിൽ ഫുഡ് ഓൺ ട്രാക്ക് ആപ്പിൽ മാത്രം ഓർഡർ ചെയ്യണമെന്ന് ഐആർസിടിസ് നിർദ്ദേശിക്കുന്നു. ഭക്ഷണം വാങ്ങുന്നതിനായി 8750001323 എന്ന നമ്പറിൽ വാട്സാപ്പും ചെയ്യുകയോ അല്ലെങ്കിൽ 1323 എന്ന നമ്പറിൽ വിളിക്കുകയോ ചെയ്യാം.
ട്രെയിൻ യാത്രയിൽ ഭക്ഷണം വാങ്ങുന്നതിനായി ഐആർസിടിസിയുടെ ഇ-കാറ്ററിംഗിന്റെ ഔദ്യോഗിക വെബ്സൈറ്റായ http://www.ecatering.irctc.co.in സന്ദർശിക്കുക. ഇനി ട്രെയിനിന്റെയോ സ്റ്റേഷന്റയോ പേരും പി.എൻ.ആർ (Passenger Name Record) നമ്പറും നൽകുക. ഇനി ഇഷ്ടമുള്ള റെസ്റ്ററന്റിലെ ഭക്ഷണം തിരഞ്ഞെടുത്ത് ഓർഡർ ചെയ്യാനാകും. ഓൺലൈനായോ അല്ലെങ്കിൽ ഭക്ഷണം ഡെലിവറി ചെയ്യുന്ന സമയത്തോ പണമടയ്ക്കാം. ഈ സേവനത്തിൽ ഭക്ഷണം യാത്രക്കാരുടെ സീറ്റിൽ എത്തിക്കും. രാജ്യത്തുടനീളമുള്ള 300-ലധികം റെയിൽവേ സ്റ്റേഷനുകളിൽ ഇ-കാറ്ററിംഗ് സേവനം ലഭ്യമാണ്.
