ഇന്ന് ലോക മുട്ടദിനം. 1996-ലാണ് വിയന്നയിൽ നടന്ന ഇന്റർനാഷണൽ എഗ്ഗ് കമ്മീഷന്റെ സമ്മേളനത്തിൽ ലോകമുട്ട ദിനം ആചരിക്കാൻ തീരുമാനിക്കുന്നത്. മുട്ടയുടെ ഗുണങ്ങൾ പ്രചരിപ്പിക്കുന്നതിന് വേണ്ടി എല്ലാ വർഷവും ഒക്ടോബറിലെ രണ്ടാം വെള്ളിയാഴ്ച ലോക മുട്ടദിനമായി തിരഞ്ഞെടുക്കുകയായിരുന്നു. ശരീരത്തിന് ആവശ്യമായ പോഷകം തരുന്ന ഏറ്റവും മികച്ച ഭക്ഷണമാണ് മുട്ട. ഈ വർഷത്തെ ലോക മുട്ടദിനത്തിന്റെ പ്രമേയം ആരോഗ്യകരമായ ഭാവിക്ക് മുട്ട എന്നതാണ്.
മുട്ട കഴിക്കുന്നതിന്റെ ആരോഗ്യ ഗുണങ്ങൾ എന്തൊക്കെയെന്ന് നോക്കാം…
ആരോഗ്യമുള്ള ഒരു വ്യക്തി ദിവസവും കുറഞ്ഞത് ഒരു മുട്ടയെങ്കിലും കഴിക്കും. ഇതിലൂടെ വേണ്ടത്ര ഊർജം ലഭിക്കും. കണ്ണിന്റെ ആരോഗ്യത്തെ സഹായിക്കുന്ന ല്യൂട്ടീൻ, സിയാക്സാന്തിൻ എന്നീ ആന്റീ ഓക്സിഡന്റുകൾ ധാരാളമായി മുട്ടയിൽ അടങ്ങിയിട്ടുണ്ട്. റെറ്റിനയ്ക്ക് നാശം സംഭവിക്കാതെ സുരക്ഷിതമാക്കാൻ സഹായകമാകുന്നു.
കൂടാതെ രക്തത്തിലെ കാത്സ്യത്തിന്റെ അളവ് നിയന്ത്രിക്കുകയും നല്ല കൊളസ്ട്രോളിന്റെ നില ഉയർത്തുന്നതിനും മുട്ട സഹായകമാണ്. ശരീരഭാരം നിയന്ത്രിക്കുന്നതിന് സഹായകമാകുന്ന ഏറ്റവും മികച്ച പോഷകാഹാരമാണ് മുട്ട. വിശപ്പ് കുറയ്ക്കുന്നതിനും കലോറി വർദ്ധിക്കുന്നത് തടയുന്നതിനും മുട്ട സഹായകമാണ്. ഒരു മുട്ട മുഴുവനായി കഴിക്കുന്നതിലൂടെ പേശികളുടെ വളർച്ചയ്ക്കും എല്ലുകളെ ശക്തിപ്പെടുത്തുന്നതിനും സഹായിക്കും.
വിറ്റാമിൻ ഡി കുറയുന്നവർക്ക് മുട്ട നല്ല ഭക്ഷണമാണ്. മുട്ടയുടെ മഞ്ഞക്കുരുവിൽ ധാരാളം വിറ്റാമിൻ ഡി അടങ്ങിയിട്ടുണ്ട്. ഒമേഗ-3ന്റെ സ്രോതസ് ഇതിൽ ധാരാളമായി അടങ്ങിയിട്ടുണ്ട്. ഇത് ഹൃദയത്തിന്റെയും തലച്ചോറിന്റെയും ആരോഗ്യ സംരക്ഷണത്തിന് നല്ലതാണ്. ഗർഭിണികൾക്ക് മുട്ടയിൽ അടങ്ങിയിരിക്കുന്ന കോളിൻ നല്ലതാണ്. ഗർഭസ്ഥ ശിശുവിന്റെ നട്ടെല്ലിന്റെ വളർച്ചയ്ക്കും, മസ്തിഷ്ക വികസനത്തിനും, ജനന വൈകല്യങ്ങളുടെ എണ്ണം കുറയ്ക്കുന്നതിനും ഗുണകരമാകും.
