കോഴിക്കോട്: കരിപ്പൂർ വിമാനത്താവളത്തിൽ 43 ലക്ഷം രൂപയുടെ സ്വർണവുമായി ഒരാൾ പിടിയിൽ. പാലക്കാട് സ്വദേശി അഷ്റഫലി (40) ആണ് പിടിയിലായത്. ശരീരത്തിൽ ഒളിപ്പിച്ച നിലയിലാണ് ഇയാൾ സ്വർണം കടത്താൻ ശ്രമിച്ചത്. 43 ലക്ഷം രൂപ വിലമതിക്കുന്ന 801 ഗ്രാം സ്വർണമാണ് ഇയാളിൽ നിന്ന് പിടിച്ചെടുത്തത്.
കരിപ്പൂർ വിമാനത്താവളം വഴിയുള്ള സ്വർണക്കടത്ത് കേസുകൾ വർദ്ധിക്കുന്ന സാഹചര്യത്തിലാണ് കസ്റ്റംസ് ഉദ്യോഗസ്ഥർ വിമാനത്താവളിത്തിൽ പരിശോധന നടത്തിയത്. തുടർന്നാണ് അഷ്റഫലിയിൽ നിന്നും സ്വർണം പിടികൂടിയത്.
വിമാനത്താവളം വഴി സ്വർണക്കടത്ത് നടത്തുന്നതിന് ഉദ്യോഗസ്ഥർ സഹായിച്ച സംഭവത്തിൽ കഴിഞ്ഞ ദിവസം ഒരു സിഐഎസ്എഫ് ഉദ്യോഗസ്ഥനെ സസ്പെൻഡ് ചെയ്തിരുന്നു. സിഐഎസ്എഫ് അസിസ്റ്റന്റ് കമാഡന്റ് നവീൻ കുമാറാണ് സസ്പെൻഷനിലായത്. നവീൻ കുമാറിനെ കൂടാതെ കസ്റ്റംസിലെ മറ്റൊരു ഉദ്യോഗസ്ഥനും സ്വർണം കടത്താൻ സഹായിച്ചിട്ടുണ്ടെന്ന് പോലീസ് കണ്ടെത്തിയിരുന്നു.
