ബാങ്ക് ലോക്കറിൽ വിലപിടിപ്പുള്ള വസ്തുക്കൾ സൂക്ഷിക്കുന്നവരാണ് മിക്കവരും. വ്യക്തികൾക്ക് പുറമെ കമ്പനികൾ, അസോസിയേഷൻ, ക്ലബ്ബുകൾ എന്നിവയും സാധാരണയായി ബാങ്ക് ലോക്കർ സൗകര്യം പ്രയോജനപ്പെടുത്താറുണ്ട്. വിലപിടിപ്പുള്ള വസ്തുക്കൾ സൂക്ഷിക്കുന്നതിന് ബാങ്ക് ലോക്കർ ഉപയോഗിക്കുന്നതാണ് സുരക്ഷിതമായ മാർഗം.
ചെറിയ തുകയിലൂടെ വരെ ബാങ്കുകൾ സുരക്ഷ ഉറപ്പു നൽകാറുണ്ട്. അടുത്തിടെ റിസർവ് ബാങ്ക് ഓഫ് ഇന്ത്യ പുറപ്പെടുവിച്ച പുതുക്കിയ മാർഗ്ഗനിർദ്ദേശങ്ങൾ പ്രകാരം നിലവിലുള്ള എല്ലാ ലോക്കർ ഉടമകളും ഈ കരാറാണ് പാലിക്കേണ്ടത്. പുതിയ കരാറുകൾ നടപ്പിലാക്കുന്നതിന് വേണ്ടി 2023 ഡിസംബർ 31 വരെ ആർബിഐ സമയപരിധി നീട്ടിയിട്ടുണ്ട്. ബാങ്ക് ലോക്കറിൽ പണം സൂക്ഷിക്കുന്നത് ഇനി മുതൽ അനുവദനീയമല്ല.എസ്ബിഐ, പഞ്ചാബ് നാഷണൽ ബാങ്ക് എന്നീ ബാങ്കുകളിൽ പണമോ കറൻസിയോ സൂക്ഷിക്കാൻ സാധിക്കില്ല.
ബാങ്ക് ലോക്കറുകൾ ആഭരണങ്ങളും രേഖകളും ഉൾപ്പെടെയുള്ള വസ്തുക്കൾ സംരക്ഷിക്കുന്നതിന് വേണ്ടിയാണ്. പിഎൻബിയുടെ പുതുക്കിയ ലോക്കർ കരാർ അനുസരിച്ച് ആയുധങ്ങൾ, സ്ഫോടക വസ്തുക്കൾ, മയക്കുമരുന്ന്, നിരോധിത വസ്തുക്കൾ, നശിക്കുന്ന വസ്തുക്കൾ, റേഡിയോ ആക്ടീവ് വസ്തുക്കൾ, നിയമവിരുദ്ധ വസ്തുക്കൾ എന്നിവ സൂക്ഷിക്കുന്നതിൽ നിരോധനം ഏർപ്പെടുത്തിയിട്ടുണ്ട്. സ്വത്ത് രേഖകൾ, ആഭരണങ്ങൾ, ലോൺ രേഖകൾ, ജനന വിവാഹ സർട്ടിഫിക്കറ്റുകൾ, സേവിംഗ്സ് ബോണ്ടുകൾ, ഇൻഷുറൻസ് പോളിസികൾ, പ്രധാനപ്പെട്ട രേഖകൾ എന്നിവ സൂക്ഷിക്കുന്നതിന് ബാങ്ക് ലോക്കറുകൾ ഉപയോഗിക്കാവുന്നതാണ്.
