കൊല്ലം: കൊട്ടിയത്ത് മയക്കുമരുന്നുമായി മെഡിക്കൽ വിദ്യാർത്ഥി പിടിയിൽ. കോഴിക്കോട് പുതുവള്ളി സ്വദേശി നൗഫൽ ആണ് പിടിയിലായത്. ഇയാളിൽ നിന്നും 70 ഗ്രാം എംഡിഎംഎ പോലീസ് കണ്ടെടുത്തു. കൊട്ടിയം പോലീസും ഡാൻസ് ആഫ് ടീമും ചേർന്ന് ഇന്ന് പുലർച്ചെ നാലുമണിയോടെയാണ് എംഡിഎംഎയുമായി ബിഡിഎസ് വിദ്യാർത്ഥിയെ പിടികൂടിയത്.
കൊട്ടിയത്തെ സ്വകാര്യ ദന്തൽ കോളജിലെ വിദ്യാർത്ഥി എംഡിഎംഎയുമായി എത്തുന്നുവെന്ന് പോലീസിന് രഹസ്യ വിവരം ലഭിച്ചിരുന്നു. തുടർന്ന് നടത്തിയ പരിശോധനയിലാണ് നൗഫൽ വലയിലായത്. ഇയാളെ കേന്ദ്രീകരിച്ച് പോലീസ് നേരത്തെയും നിരീക്ഷണം നടത്തി വരികയായിരുന്നു.
മെഡിക്കൽ വിദ്യാർത്ഥികളെ കേന്ദ്രീകരിച്ചുള്ള ലഹരി വിൽപ്പനയായിരുന്നു പ്രതിയുടെ ലക്ഷ്യമെന്ന് പോലീസ് പറയുന്നു. ഇയാളുടെ സുഹൃത്തുക്കളായ മെഡിക്കൽ വിദ്യാർത്ഥികളെ കേന്ദ്രീകരിച്ചും പോലീസ് അന്വേഷണം ആരംഭിച്ചിട്ടുണ്ട്.
