സിംഗപ്പൂർ: സിംഗപ്പൂർ വ്യാപാര മന്ത്രി ഗാൻ കിം യോങുമായി വിദേശകാര്യമന്ത്രി എസ് ജയശങ്കർ കൂടിക്കാഴ്ച നടത്തി. ഇരു രാജ്യങ്ങളും തമ്മിലുള്ള സഹകരണത്തിന്റെ പുതിയ മേഖലകളെ കുറിച്ച് ഇരു നേതാക്കളും ചർച്ച നടത്തി. സഹകരണത്തിന്റെ പുതിയ ആശയങ്ങൾ വികസിപ്പിക്കാൻ കാത്തിരിക്കുകയാണെന്നും ഇന്ത്യയും സിംഗപ്പൂരും തമ്മിൽ ചരിത്രപരമായ ബന്ധമാണുള്ളതെന്നും കൂടിക്കാഴ്ചയ്ക്ക് ശേഷം ജയശങ്കർ ട്വിറ്ററിൽ കുറിച്ചു.
ദ്വിദിന സന്ദർശനത്തിനായാണ് ജയശങ്കർ സിംഗപ്പൂരിലെത്തിയത്. സിംഗപ്പൂർ പ്രധാനമന്ത്രി ലീ സീയാൻ ലൂംഗുമായും മറ്റ് ഉന്നത നേതാക്കളുമായും ജയശങ്കർ കൂടിക്കാഴ്ച നടത്തും. ഇന്ത്യൻ മിഷൻ മേധാവികളുടെ സമ്മേളനത്തിൽ ജയശങ്കർ അദ്ധ്യക്ഷത വഹിക്കും.
കഴിഞ്ഞ ദിവസം നടന്ന ആസിയാൻ, ഈസ്റ്റ് ഏഷ്യ അംബാസഡർമാരുടെ സമ്മേളനത്തിലും ജയശങ്കർ അദ്ധ്യക്ഷത വഹിച്ചു. ഈസ്റ്റ് ഏഷ്യ ഉച്ചകോടി, ജി 20, കോമൺവെൽത്ത്, ഇന്ത്യൻ ഓഷ്യൻ റിം അസോസിയേഷൻ , ഇന്ത്യൻ ഓഷ്യൻ നേവൽ സിമ്പോസിയം എന്നിവയുൾപ്പെടെ നിരവധി സമ്മേളനങ്ങളിൽ ഇരു രാജ്യങ്ങളും അംഗങ്ങളാണ്.
വിയറ്റ്നാം വിദേശകാര്യ മന്ത്രി ബുയി തൻ സോണിന്റെ ക്ഷണപ്രകാരം ഒക്ടോബർ 15 മുതൽ 18 വരെ ജയശങ്കർ വിയറ്റ്നാമിൽ സന്ദർശനം നടത്തിയിരുന്നു. സന്ദർശനവേളയിൽ ജയശങ്കർ വിയറ്റ്നാം പ്രധാനമന്ത്രി ഫാം മിൻ ചിന്നുമായും കൂടിക്കാഴ്ച നടത്തിരുന്നു.
