മനുഷ്യൻ ആയുസ്സിന്റെ ശരാശരി മൂന്നിലൊരു ഭാഗം ഉറക്കത്തിന് വേണ്ടിയാണ് ഉപയോഗിക്കുന്നതെന്നാണ് കണക്കുകൾ പറയുന്നത്. എന്നാൽ, ചിലർക്ക് എത്രത്തോളം ഉറങ്ങിയാലും മതിവരില്ല. ആവശ്യത്തിലധികം കിടന്നുറങ്ങത് ശരീരത്തിന് നല്ലതല്ല എന്നറിയാമെങ്കിലും ഇത് പിന്തുടരുന്നവരുണ്ട്. എന്നാൽ, അത്തരക്കാർക്ക് വേണ്ടിയൊരു സന്തോഷവാർത്തയാണിപ്പോൾ പുറത്ത് വരുന്നത്.
കൂടുതൽ സമയം ഉറങ്ങിയാൽ സമ്മാനമായി ലഭിക്കാൻ പോകുന്നത് വൻ തുകയാണ്. കിഴക്കൻ യൂറോപ്പിലെ മോണ്ടിനെഗ്രോ ഗ്രാമമായ ബ്രെസ്നയിലാണ് വ്യത്യസ്തമായ മത്സരം നടക്കുന്നത്. ഉറക്കത്തോടുള്ള അഗാധമായ സ്നേഹത്തെ ആഘോഷിക്കുന്ന ഒരു ഉത്സവത്തിലാണ് ഈ മത്സരം നടക്കുന്നത്. ‘അലസതയുടെ ഉത്സവം’ എന്നാണ് ഈ മത്സരത്തെയും അറിയപ്പെടുന്നത്. ഈ മത്സരത്തിൽ പങ്കെടുക്കുന്നവർക്ക് 1,000 യൂറോ (ഏകദേശം 90,000 രൂപ) ആണ് സമ്മാനമായി ലഭിക്കുന്നത്.
ഈ മത്സരത്തിൽ ജയിക്കുന്ന വ്യക്തിയെ ‘ഏറ്റവും മടിയനായ പൗരനാ’യി കണക്കാക്കുകയും ചെയ്യും. ഈ മത്സരത്തിൽ പങ്കെടുക്കുന്നതിന് ചില മാനദണ്ഡങ്ങളുണ്ട്. മത്സരാത്ഥികൾ മെത്തയിൽ തിരശ്ചീനമായി വേണം വിശ്രമിക്കാൻ. കഴിവതും ശരീരം ചലിപ്പിക്കാതെ വേണം കിടന്നുറങ്ങാൻ. കൂടാതെ, മത്സരാർത്ഥികൾക്ക് കിടക്കയിൽ ഇരുന്ന് പുസ്തകങ്ങൾ വായിക്കാനും അവരുടെ മൊബൈൽ ഉപകരണങ്ങൾ ഉപയോഗിക്കാനും അനുമതിയുണ്ട്. ഓരോ എട്ട് മണിക്കൂറിലും അവർക്ക് 15 മിനിറ്റ് ഇടവേള അനുവദിച്ചിട്ടുണ്ട്.
ഒരു റിസോട്ടിലെ വലിയൊരു മുറിയിലാണ് ഈ മത്സരം നടക്കുന്നത്. ഭക്ഷണവും കിടക്കയും എല്ലാം അവിടെ സജ്ജീകരിച്ചിട്ടുമുണ്ട്. മത്സരാർത്ഥികൾക്ക് ദിവസേന മൂന്ന് ഭക്ഷണമാണ് നൽകുന്നത്. ഒപ്പം ഇരിക്കാനോ നിൽക്കാനോ ആരെങ്കിലും ശ്രമിച്ചാൽ മത്സരാർത്ഥി ഉടൻ അയോഗ്യരാകും.
മോണ്ടിനെഗ്രിനിലുളളവർ നിഷ്ക്രിയരാണെന്നുള്ള സംസാരത്തെ വെല്ലുവിളിക്കാനാണ് ഈ മത്സരം ആദ്യ നാളുകളിൽ ആരംഭിച്ചത്. എന്നാൽ പിന്നീട് ഈ മത്സരം ഈ പ്രദേശത്തെ പാരമ്പര്യത്തിന്റെ ഭാഗമായി മാറി. നമ്മുടെ തിരക്കേറിയ ജീവിതത്തിൽ ഒഴിവുസമയത്തിനും നർമ്മത്തിനും അൽപ്പം അലസതയ്ക്കും ഒരിടമുണ്ടെന്ന ഓർമ്മപ്പെടുത്തൽ കൂടിയാണ് ഈ മത്സരം.
