കടലിന്റെ ആഴങ്ങളിൽ അപൂർവ്വങ്ങളായ നിരവധി ജീവികൾ ഉണ്ട്. നിബിഡ വനങ്ങളിലും, ഗുഹകളിലും ഇത്തരം ജീവികളെ പലപ്പോഴും കണ്ടെത്തിയിട്ടുണ്ട്. അടുത്തിടെ, പാപ്പുവ ന്യൂ ഗിനിയയിലും സമാനമായ ഒന്ന് കണ്ടെത്തി. പപ്പുവ ന്യൂ ഗിനിയയിലെ ഒരു കടൽത്തീരത്താണ് ചത്തതും , അഴുകിയതുമായ വെളുത്ത നിറമുള്ള ജീവിയുടെ രൂപം അടിഞ്ഞത് . മത്സ്യകന്യകയ്ക്ക് സമാനമായ രീതിയിലുള്ള അജ്ഞാതജീവി ആദ്യം ജനങ്ങളിൽ പരിഭ്രാന്തി പരത്തിയെങ്കിലും പിന്നീട് അത് അത്ഭുതത്തിന് വഴി മാറി.
“ന്യൂ അയർലണ്ടേഴ്സ് ഒൺലി” എന്ന ഫേസ്ബുക്ക് പേജിലാണ് ഇതിന്റെ ചിത്രങ്ങൾ പങ്ക് വച്ചത് . ഈ ചിത്രങ്ങൾ കണ്ട് നിരവധി പേരാണ് കമന്റുമായി എത്തുന്നത്. ചിലർ ഇതിനെ മത്സ്യകന്യകയെന്നും ചിലർ ഭൂതമെന്നും ചിലർ അന്യഗ്രഹജീവിയെന്നും വിളിക്കുന്നുണ്ട് . എന്നാൽ വിദഗ്ധർക്ക് ഇപ്പോഴും അത് എന്താണെന്ന് മനസ്സിലാക്കാൻ കഴിഞ്ഞിട്ടില്ല. പക്ഷേ ഇത് ആദ്യമായി ഭൂമിയിൽ എത്തിയ കടൽ ജീവി ആണെന്നും വിദഗ്ധർ പറയുന്നു.
ഭൂരിഭാഗവും ജീർണിച്ചതിനാൽ, അതിന്റെ യഥാർത്ഥ ഉത്ഭവം കണ്ടെത്താൻ പ്രയാസമാണ്. കൂടാതെ, കടലിൽ വീണ് ശരീരത്തിന്റെ ചില ഭാഗങ്ങൾ കാണാതായിട്ടുണ്ട്. സംസ്കരിക്കുന്നതിന് മുമ്പ് അതിന്റെ വലിപ്പവും ഭാരവും കൃത്യമായി അളന്നിരുന്നില്ല. കൂടാതെ, ആരും ഡിഎൻഎ സാമ്പിളുകൾ സൂക്ഷിച്ചില്ല, അതും പഠനം അസാധ്യമാക്കി.
