ഹൈദരാബാദ്: നിയമസഭാ തിരഞ്ഞെടുപ്പ് നടക്കുന്ന തെലങ്കാനയിൽ സ്ഥാനാർത്ഥികളുടെ ആദ്യ ഘട്ട പട്ടിക പുറത്തുവിട്ട് ബിജെപി. 55 മണ്ഡലങ്ങളിലെ സ്ഥാനാർത്ഥി പട്ടികയാണ് പുറത്തുവിട്ടത്. ആകെ മൊത്തം 119 നിയമസഭാ മണ്ഡലങ്ങളാണ് സംസ്ഥാനത്തുള്ളത്.
പിന്നാക്ക വിഭാഗങ്ങളിൽ നിന്ന് 20 പേരും പട്ടികജാതി-പട്ടികവർഗത്തിൽ നിന്ന് 14 പേരും റെഡ്ഡി സമുദായത്തിൽ നിന്ന് 14 പേരും വേലമ സമുദായത്തിൽ നിന്ന് ആറ് പേരും പട്ടികയിൽ ഉൾപ്പെടുന്നുണ്ട്. 12 നിയമസഭാ മണ്ഡലങ്ങളിൽ ജനസേനയാണ് മത്സരിക്കുന്നത്. തിരഞ്ഞെടുപ്പിന് മുമ്പ് സ്വീകരിച്ച സഖ്യ ചർച്ചയുടെ ഭാഗമായാണ് തീരുമാനം.
ബിജെപി ഉപാദ്ധ്യക്ഷ ഡികെ അരുണ, മുൻ എംപിമാരായ കൊമാട്ടിറെഡ്ഡി രാജഗോപാൽ റെഡ്ഡി, എം വിജയശാന്തി, കേന്ദ്ര ടൂറിസം മന്ത്രി ജി കിഷൻ റെഡ്ഡി, രാജ്യസഭാ എംപി കെ ലക്ഷ്മൺ എന്നിവരുടെ പേരുകൾ നിലവിലെ പട്ടികയിൽ ഉൾപ്പെടുത്തിയിട്ടില്ലെങ്കിലും അടുത്ത ഘട്ട പട്ടികയിൽ എത്താനാണ് സാധ്യത.
