കണ്ണൂർ: സൗഹൃദം സ്ഥാപിച്ച് വിവിധ ആളുകളിൽ നിന്നും 1 കോടി രൂപയിലധികം പണം തട്ടിയ കേസിൽ നാല് പേർ പിടിയിൽ. ദുബായി കറൻസി(ദിർഹം) ആണെന്ന പേരിൽ ന്യൂസ് പേപ്പർക്കെട്ട് നൽകിയാണ് പ്രതികൾ 1 കോടി രൂപയിലധികം പണം തട്ടിയത്. കച്ചവടത്തിനാണെന്ന വ്യാജേനയാണ് തട്ടിപ്പ് സംഘം പരിചയപ്പെടുന്ന ആളുകളിൽ നിന്നും പണം തട്ടിയിരുന്നത്.
പരിചയപ്പെട്ട ആളുകളുടെ വിശ്വാസം നേടിയെടുക്കാനായി തുടക്കത്തിൽ ഇന്ത്യൻ കറൻസി നോട്ടുകൾക്കിടയിൽ ദിർഹം വച്ചു നൽകുകയും ആളുകൾ ശ്രദ്ധിക്കുമ്പോൾ അറിയാതെ നോട്ടുകൾക്കിടയിൽ വന്നു പോയതാണെന്നും പറയുന്നു. പിന്നീട് ദിർഹം ഇന്ത്യൻ കറൻസിയാക്കി മാറ്റി തന്നാൽ പണം നൽകാമെന്നും പറഞ്ഞായിരുന്നു ഇവർ പരിചയപ്പെട്ട ആളുകളുടെ വിശ്വാസം നേടിയെടുത്തിയിരുന്നത്. തുടർന്ന് ചെറിയ തുകയുടെ ദിർഹങ്ങൾ ഇത്തരത്തിൽ മാറ്റിയെടുത്ത് പരിചയപ്പെട്ട ആളുകൾക്ക് പണം കൊടുക്കാനും സംഘം തുടങ്ങി. ഇതോടെ ആളുകളുടെ പൂർണ വിശ്വാസം നേടിയെടുത്ത പ്രതികൾ തങ്ങളുടെ പക്കൽ വലിയ തുകയ്ക്കുള്ള ദിർഹമുണ്ടെന്നും ഇത് മാറ്റി തരാൻ ആവശ്യപ്പെടുകയും ചെയ്യുന്നു.
ഇരട്ടി ലാഭം പ്രതീക്ഷിച്ച് ദിർഹം മാറ്റി തരാൻ സമ്മതിക്കുന്നവർക്ക് നോട്ടുകൾക്കിടയിൽ ന്യൂസ് പേപ്പർക്കെട്ടുകൾ വെച്ച് തുക കൈമാറുകയും ആളുകളുടെ പക്കൽ നിന്നും കോടികൾ തട്ടിയെടുത്ത ശേഷം പ്രതികൾ മുങ്ങുകയും ചെയ്തു. ഇത്തരത്തിൽ നിരവധി പ്രദേശങ്ങളിൽ വ്യത്യസ്ത രീതികളിലാണ് പ്രതികൾ തട്ടിപ്പ് നടത്തിയിരുന്നത്. പ്രതികളിൽ നിന്നും നിരവധി മൊബൈൽ ഫോണുകളും പത്തിലധികം തിരിച്ചറിയൽ കാർഡുകളും ദിർഹം കറൻസികളും പോലീസ് പിടിച്ചെടുത്തു.
