ദീർഘ ദൂര യാത്രികർ നേരിടുന്ന വലിയൊരു പ്രശ്നമാണ് കെഎസ്ആർടിസി ബസുകളുടെ സമയക്രമം. പലപ്പോഴും അടുത്ത കെഎസ്ആർടിസി ബസ് എപ്പോഴാണെന്ന് അറിയാതെ ഒരുപാട് നേരം കാത്തിരുന്ന് മുഷിഞ്ഞവരായിരിക്കും നമ്മളിൽ പലരും. അത്തരം സന്ദർഭങ്ങൾ ഒഴിവാക്കാനുള്ള ഒരു പരിഹാര മാർഗവുമായിട്ടാണ് ഗൂഗിൾ ഇപ്പോൾ എത്തിയിരിക്കുന്നത്. ഇനി ഗൂഗിൾ മാപ്പ് നോക്കി കെഎസ്ആർടിസി ബസുകളുടെ സമയം മനസിലാക്കാം.
ബസുകളുടെ വരവും പോക്കും ഗൂഗിൾ മാപ്പ് ഉപയോഗിച്ച് അറിയാനുള്ള പുതിയ സാങ്കേതികവിദ്യയാണിത്. ആദ്യഘട്ടത്തിൽ തമ്പാനൂർ ഡിപ്പോയിലുള്ള ദീർഘദൂര കെഎസ്ആർടിസി ബസുകളുടെ വിവരങ്ങളാണ് ഗൂഗിളിൽ ഉണ്ടാവുക. ഗൂഗിൾ ട്രാൻസിസ്റ്റർ വഴിയാണ് യാത്രക്കാർക്ക് വിവരങ്ങൾ ലഭ്യമാകുക.
സൂപ്പർഫാസ്റ്റ് ബസുകളിൽ പകുതി ബസുകളുടെയും വിവരങ്ങൾ ഷെഡ്യൂളാക്കി കഴിഞ്ഞിട്ടുണ്ട്. ബസുകളിൽ ജിപിഎസ് ഘടിപ്പിക്കുന്നതിനായുള്ള നീക്കങ്ങൾ അന്തിമ ഘട്ടത്തിലാണ്. ജിപിഎസ് പ്രവർത്തനക്ഷമമായാൽ ബസുകളുടെ തത്സമയ വിവരങ്ങൾ യാത്രക്കാരിലേക്ക് എത്തിക്കാൻ ഗൂഗിളിന് സാധിക്കും. മൊബൈൽ ആപ്പായ കെഎസ്ആർടിസി നിയോയിലൂടെയായിരിക്കും ദീർഘദൂര കെഎസ്ആർടിസി ബസുകളുടെ വിവരങ്ങൾ പങ്കുവയ്ക്കുന്നത്.