മുംബൈ; വാങ്കഡെ സ്റ്റേഡിയത്തിലെ മഹമ്മദുള്ളയുടെ ഒറ്റായാള് പോരാട്ടവും ബംഗ്ലാദേശിനെ തുണച്ചില്ല. താരത്തിന്റെ സെഞ്ച്വറി പരാജയ ഭാരം കുറയ്ക്കാനായെന്ന് ബംഗ്ലാദേശിന് ആശ്വസിക്കാം. 383 റണ്സിന്റെ കൂറ്റന് വിജയലക്ഷ്യം പിന്തുടര്ന്നിറങ്ങിയ ബംഗ്ലാദേശ് ബാറ്റര്മാര് ചീട്ടുകൊട്ടാരം പോലെ തകരുന്നതാണ് കണ്ടത്. ഒടുവില് 149 റണ്സിന്റെ വിജയവുമായി ദക്ഷിണാഫ്രിക്ക നാലാം മത്സരവും കൈപിടിലൊതുക്കി.
104 പന്തില് നിന്നാണ് മഹമ്മദുള്ള സെഞ്ച്വറി പൂര്ത്തിയാക്കിയത്. 81-6 എന്ന നിലയില് നിന്ന് ടീമിനെ വലിയ നാണക്കേടില് നിന്ന് കരകയറ്റിയത് മുഹമ്മദുള്ളയുടെ ചെറുത്തുനില്പ്പാണ്.ആറാമനായി ഇറങ്ങിയ താരം ഒമ്പതാം വിക്കറ്റായി മിഡ് ഓഫില് റബാദയ്ക്ക് ക്യാച്ച് നല്കിയാണ് മടങ്ങിയത്. 111 പന്തില് 11 ബൗണ്ടറിയും 4 സിക്സറുകളുമടക്കം 11 റണ്സാണ് നേടിയത്. ഒമ്പതാം വിക്കറ്റില് മുസ്തഫിസൂറുമായി 50 റണ്സിന്റെ കൂട്ടുകെട്ടും താരം സൃഷ്ടിച്ചിരുന്നു.
ക്യാപ്റ്റന് ഷാക്കിബ് അടക്കം മൂന്നുപേരാണ് രണ്ടക്കം കാണാതെ കൂടാരം കയറിയത്. 233 റണ്സിന് എല്ലാവരും പുറത്തായി. ഹസന് മിറാസ് (11), നാസും മുഹമ്മദ് (19), മുസ്തഫിസൂര് റഹ്മാന്(11) എന്നിവരാണ് പുറത്തായ മറ്റു ബാറ്റര്മാര്.
മാര്കോ ജാന്സന്,റബാദ, ലിസാന്ഡ് വില്യംസണ് എന്നിവര്ക്ക് രണ്ടു വിക്കറ്റ് വീതവും ജെറാള്ഡ് കാറ്റ്സിക്ക് മൂന്നു വിക്കറ്റും ലഭിച്ചു. സ്പിന്നറായ കേശവ് മഹാരാജിന് ഒരുവിക്കറ്റും ലഭിച്ചു. 174 റണ്സെടുത്ത് ദക്ഷിണാഫ്രിക്കന് ഇന്നിംഗ്സിന്റെ നെടുംതൂണായ ഡിക്കോക്കാണ് മാന് ഓഫ് ദി മാച്ച്.
