തിരുവനന്തപുരം: സിനിമ തീയറ്ററിൽ അർദ്ധ നഗ്നനായി മോഷണം നടത്തുന്ന പ്രതിക്കായി അന്വേഷണം ഊർജ്ജിതപ്പെടുത്തി പോലീസ്. സിസിടിവി ദൃശ്യങ്ങളുടെ അടിസ്ഥാനത്തിലാണ് അന്വേഷണം. കഴിഞ്ഞ ദിവസം ആറ്റിങ്ങൽ ഗംഗ തീയറ്ററിൽ സിനിമ കാണാൻ എത്തിയവരുടെ പേഴ്സുകൾ നഷ്ടപ്പെട്ടതായി തീയറ്റർ ജീവനക്കാർ പരാതി നൽകിയിരുന്നു. തുടർന്ന് സിസിടിവി ദൃശ്യങ്ങളെ കേന്ദ്രീകരിച്ച് നടത്തിയ അന്വേഷണത്തിലാണ് കള്ളനെ കണ്ടെത്തിയത്.
ടിക്കറ്റെടുത്ത് തിയറ്ററിൽ കയറുന്ന യുവാവ് ആളൊഴിഞ്ഞ ഭാഗത്തേയ്ക്ക് മാറി ഇരിക്കും. ലൈറ്റ് ഓഫ് ചെയ്യുമ്പോൾ വസ്ത്രങ്ങൾ ഊരിമാറ്റി അർദ്ധ നഗ്നനായി സീറ്റുകൾക്ക് പിന്നിലൂടെ ഇഴഞ്ഞുനീങ്ങി പേഴ്സുകൾ മോഷ്ടിക്കും. ശേഷം സീറ്റിൽ തിരിച്ചെത്തി വസ്ത്രങ്ങൾ ധരിച്ച് സിനിമ കഴിയുമ്പോൾ പുറത്തിറങ്ങും.
ഗംഗ തിയേറ്ററിൽ കഴിഞ്ഞ ദിവസം സിനിമ കാണാനെത്തിയ ഏതാനും യുവതികളുടെ പേഴ്സും നഷ്ടപ്പെട്ടിരുന്നു. ജീവനക്കാരെ വിവരമറിയിച്ച ശേഷം സിസിടിവി പരിശോധിച്ചപ്പോഴാണ് മോഷണ ദൃശ്യങ്ങൾ ലഭിച്ചത്. എന്നാൽ പണം നഷ്ടപ്പെട്ടതുമായി ബന്ധപ്പെട്ട് ആരും പോലീസിൽ പരാതികൾ നൽകിയിട്ടില്ലെന്ന് ഇൻസ്പെക്ടർ മുരളീകൃഷ്ണ പറഞ്ഞു. ദൃശ്യങ്ങളുടെ അടിസ്ഥാനത്തിൽ മോഷ്ടാവിനെ കണ്ടെത്താൻ ശ്രമം തുടരുകയാണെന്നും പോലീസ് അറിയിച്ചു.
