മലയാളത്തിന്റെ മെഗാസ്റ്റാർ മമ്മൂട്ടിയുടെ സൗന്ദര്യം സിനിമാ ലോകത്ത് എന്നും ചർച്ചയാണ്. ഓരോ വർഷം കൂടുംതോറും അദ്ദേഹത്തിന്റെ ഗ്ലാമർ കൂടുകയാണെന്നാണ് ഒട്ടുമിക്ക ആരാധകരുടെ അഭിപ്രായം. താരങ്ങളെ പോലും അസൂയപ്പെടുത്തുന്ന മലയാളത്തിന്റെ നിത്യ യൗവ്വനത്തിന്റെ സിനിമകൾക്കും സമൂഹമാദ്ധ്യമങ്ങളിൽ എത്തുന്ന പുത്തൻ ഫോട്ടോകൾക്കും ആരാധകർ ഏറെയാണ്. എന്നാൽ കഴിഞ്ഞ ദിവസങ്ങളായി സമൂഹമദ്ധ്യമങ്ങളിൽ വെെറലാകുന്നത് മമ്മൂട്ടിയുടെ വേറിട്ടൊരു ചിത്രമാണ്.
നടന്‍ മമ്മൂട്ടിയുടെ യഥാര്‍‌ത്ഥ ചിത്രം എന്ന പേരിലാണ് സമൂഹ മാദ്ധ്യമങ്ങളിൽ ഇത് വെെറലാകുന്നത്. കഴുത്തിലും മുഖത്തും ചുളിവുകളും മീശ നരച്ച കഷണ്ടിയുമായി ഉള്ള മമ്മൂട്ടിയെയാണ് ചിത്രത്തില്‍ കാണാന്‍ കഴിയുന്നത്. വിവിധ സിനിമ ഗ്രൂപ്പുകളില്‍ അടക്കം ഈ ചിത്രം ചര്‍ച്ചയായിരുന്നു. ഇതോടെ നിരവധിപേർ രംഗത്തെത്തി.
ചിത്രത്തിന് പിന്നിലെ സത്യാവസ്ഥ വെളിപ്പെടുത്തുന്ന വീഡിയോ പുറത്തുവന്നതോടെയാണ് ചിത്രം ഫോട്ടോഷോപ്പ് ആണെന്ന് വ്യക്തമായത്. മമ്മൂട്ടി ഫാൻസ് ഭാരവാഹിയും മമ്മൂട്ടിയുടെ ജീവകാരുണ്യ പ്രസ്ഥാനങ്ങൾ ഏകോപിപ്പിക്കുന്നയാളുമായ റോബർട്ട് കുര്യാക്കോസാണ് വീഡിയോ പങ്കുവെച്ചത്. “ഒരുപാട് പേരെ അസൂയപ്പെടുത്തുന്ന ഈ നിത്യ യൗവ്വനത്തിന് ചുളിവും നരയും നൽകിയ ഡിജിറ്റൽ തിരക്കഥയുടെ വഴി ഇതാണ്. കാലത്തിന് തോൽപ്പിക്കാനായില്ല, പിന്നെ അല്ലേ ഒരു ഫോട്ടോഷോപ്പിന്”എന്നാണ് റോബർട്ട് കുര്യാക്കോസ് വീഡിയോ പങ്കുവെച്ച് കൊണ്ട് കുറിച്ചിരിക്കുന്നത്.
