അടുത്ത മാസം മുതൽ ഭാര്യയ്ക്ക് ശമ്പളമായി 5 ലക്ഷം രൂപ കൊടുക്കുമെന്ന് നടൻ സുരേഷ് ഗോപി. കുറച്ച് വർഷമായി താൻ ഇത് ഭാര്യയോട് പറയുകയാണെന്നും രാധിക സമ്മതിച്ചാൽ അടുത്ത മാസം മുതൽ ശമ്പളം നൽകുമെന്നും സുരേഷ് ഗോപി പറഞ്ഞു. ഒരു അഭിമുഖത്തിനിടയിലായിരുന്നു താരം ഇക്കാര്യങ്ങൾ തുറന്ന് പറഞ്ഞത്.
‘കഴിഞ്ഞ ദിവസം സോഷ്യൽ മീഡിയയിൽ നോക്കിയപ്പോൾ അമ്പതിനായിരം രൂപ മാസ ശമ്പളം ഭാര്യയ്ക്ക് ജോയ്മാത്യു കൊടുക്കുന്നത് കണ്ടു. ഞാൻ ഇത് എന്റെ ഭാര്യയോട് 4,5 വർഷം കൊണ്ട് പറയുകയാണ് പക്ഷേ, അവൾ സമ്മതിക്കുന്നില്ല. അടുത്തമാസം മുതൽ ഭാര്യയ്ക്ക് 2 ലക്ഷം രൂപയോ, അഞ്ച് ലക്ഷം വരെ കൊടുക്കാനോ ഞാൻ തയ്യാറാണ്.
കാരണം എന്റെ മക്കളെ ഇങ്ങനെ കല്യാണം കഴിപ്പിച്ച് മറ്റ് കുടുംബങ്ങളിലേക്ക് അയക്കാനും ആ കുടുംബങ്ങളിൽ നിന്നും എന്റെ കുടുംബത്തിലേക്ക് കൊണ്ടുവരുന്നതിനുമുള്ള അവസ്ഥയിലേക്ക് വളർത്തി എടുത്തത് രാധിക മാത്രമാണ്. ഞാൻ ഓടി നടന്ന് സിനിമാ പണിചെയ്തു, രാഷ്‌ട്രീയ പണി ചെയ്തു. ഇതിൽ നിന്നുള്ള വരും വരായ്കൾ ഉണ്ടായി. രാധിക എല്ലാം സഹിച്ചു. ഇതിനിടയിൽ അസന്തുലിതാവസ്ഥ ഒക്കെ ഉണ്ടായി. അതെല്ലാം സഹിച്ച് എന്റെ മക്കളെ വളർത്തി എടുത്തു.
ജനങ്ങൾക്ക് എന്നെക്കാൾ ആ വീടിനോടാണ് ഇഷ്ടം. അത് വീടാക്കി എടുത്തത് രാധിക ആണ്. ഞാൻ ഇത്രയും നാൾ കൊടുക്കാത്ത ശമ്പളം കൂടി രാധികയ്‌ക്ക് കൊടുക്കണം. എന്റെ സ്വത്ത് വകകൾ എല്ലാം നോക്കിയാൽ, അതിലെ പകുതി രാധികയുടെ പേരിലാണ്. ഞാൻ അത് അങ്ങനെയാണ് രജിസ്റ്റർ ചെയ്തിരിക്കുന്നത്.’- സുരേഷ് ഗോപി പറഞ്ഞു.
