പുതിയ വിക്ഷേപണ റോക്കറ്റ് പുറത്തിറക്കി ഇന്ത്യൻ എയറോസ്പേസ് സ്റ്റാർട്ട് ആപ്പ് ആയ സ്കൈറൂട്ട് എയറോസ്പേസ്. ഏഴ് നിലയോളം ഉയരമാണ് റോക്കറ്റിനുള്ളത്. ഈ മൾടി സ്റ്റേജ് റോക്കറ്റിന് വിക്രം-1 എന്നാണ് പേര് നൽകിയിരിക്കുന്നത്. ഉപഗ്രഹങ്ങൾ വിന്യസിക്കുന്നതിന് വേണ്ടി സജ്ജമാക്കിയ റോക്കറ്റ് ആണിത്. ഉപഗ്രഹങ്ങൾ വിന്യസിക്കാൻ ശേഷിയുള്ള അത്യാധുനിക സംവിധാനങ്ങളാൽ സജ്ജമാക്കിയ റോക്കറ്റ് ആണിത്. നിരവധി സവിശേഷതകളോടെ സജ്ജമാക്കിയിരിക്കുന്ന റോക്കറ്റ് ആഗോള തലത്തിൽ തന്നെ ചുരുക്കം ചില സ്വകാര്യ റോക്കറ്റുകളിൽ ഒന്നാണെന്ന് കമ്പനി അവകാശപ്പെടുന്നു.
സ്കൈറൂട്ട് പുറത്തിറക്കുന്ന രണ്ടാമത്തെ റോക്കറ്റ് ആണിത്. വിക്രം-എസ് എന്നായിരുന്നു ആദ്യ റോക്കറ്റിന് നൽകിയ പേര്. ഒരു സ്വകാര്യ കമ്പനി നിർമ്മിക്കുന്ന രാജ്യത്തെ തന്നെ ആദ്യ റോക്കറ്റാണിത്. കഴിഞ്ഞ നവംബറിലാണ് ഇത് വിജയകരമായി വിക്ഷേപിച്ചത്. അത്യാധുനിക സാങ്കേതിക വിദ്യകൾ ഉൾപ്പെടുത്തി രൂപകൽപ്പന ചെയ്ത റോക്കറ്റാണ് വിക്രം-1. ഏകദേശം 300 കിലോഗ്രാം ഭാരമുള്ള പേലോഡ് ലോ എർത്ത് ഓർബിറ്റിൽ എത്തിക്കാൻ ഈ റോക്കറ്റിന് സാധിക്കും.
കാർബൺ ഫൈബറിലാണ് റോക്കറ്റിന്റെ ബോഡി നിർമ്മിച്ചിരിക്കുന്നത്. ഇന്ത്യൻ ബഹിരാകാശ പദ്ധതിയുടെ ഉപജ്ഞാതാവായ ഡോ.വിക്രം സാരാഭായിയുടെ പേരാണ് വിക്രം സീരീസ് റോക്കറ്റുകൾക്ക് നൽകിയിരിക്കുന്നത്. ചെറിയ ഉപഗ്രഹങ്ങൾ വിക്ഷേപിക്കുന്നതിന് വേണ്ടിയാണ് റോക്കറ്റ് സജ്ജമാക്കിയിരിക്കുന്നത്. ഒന്നിലധികം ഉപഗ്രഹങ്ങൾ ഇതിന് ഒരേ സമയം വിക്ഷേപിക്കാനാകും. 3-ഡി പ്രിന്റ് ചെയ്ത ലിക്വിഡ് എഞ്ചിനുകളാണ് ഇതിൽ ഉപയോഗിച്ചിരിക്കുന്നത്. ഉപഗ്രഹങ്ങൾ വിക്ഷേപിക്കുന്നതിനും പര്യവേഷണ ദൗത്യങ്ങൾ നടത്തുന്നതിനും ഇത് ഉപയോഗപ്രദമാകും.
