വർഷങ്ങൾക്ക് ശേഷം സുരേഷ് ഗോപിയും ബിജുമേനോനും ഒന്നിക്കുന്ന ത്രില്ലർ ചിത്രം ‘ഗരുഡൻ’ നവംബർ മൂന്നിന് തിയേറ്ററുകളിൽ എത്തും. സെൻസറിംഗ് പൂർത്തിയായ ചിത്രത്തിന് യു/എ സർട്ടിഫിക്കറ്റാണ് ലഭിച്ചിരിക്കുന്നത്. നവാഗതനായ അരുൺ വർമ സംവിധാനം ചെയ്യുന്ന ചിത്രം ലീഗൽ ത്രില്ലർ ജോണറിലാണ് ഉൾപ്പെടുന്നത്. നിയമ പോരാട്ടത്തിന്റെ കഥ പറയുന്ന ഗരുഡന്റെ തിരക്കഥ ഒരുക്കിയിരിക്കുന്നത് മിഥുൻ മാനുവൽ തോമസാണ്. അഞ്ചാംപാതിരക്ക് ശേഷം മിഥുൻ മാനുവൽ തിരക്കഥ ഒരുക്കുന്ന ചിത്രത്തിനായി ഏറെ പ്രതീക്ഷയോടെയാണ് ആരാധകർ കാത്തിരിക്കുന്നത്.
സുരേഷ് ഗോപിയുടെ മികച്ച പോലീസ് വേഷങ്ങളിൽ ഒന്നാണ് അരുൺ ഗരുഡനിലൂടെ ആരാധകർക്ക് സമ്മാനിക്കുന്നത്. ഓഗസ്റ്റിൽ ചിത്രീകരണം പൂർത്തിയായ സിനിമയുടെ ഷൂട്ടിംഗ് ഹൈദരാബാദ്, കൊച്ചി എന്നിവിടങ്ങളിലായിരുന്നു. മൂന്ന് ഷെഡ്യൂളുകളിലായി 75 ദിവസത്തോളമായിരുന്നു ചിത്രീകരണം.
മാജിക് ഫ്രെയിംസിന്റെ ബാനറിൽ ലിസ്റ്റിൻ സ്റ്റീഫൻ നിർമ്മിക്കുന്ന ചിത്രത്തിൽ അഭിരാമിയാണ് നായിക. ജഗദീഷ്, സിദ്ധിഖ്, ദിവ്യ പിള്ള, മാളവിക, നിഷാന്ത് സാഗർ, തലൈവാസൽ വിജയ്, ദിലീഷ് പോത്തൻ, മേജർ രവി, ബാലാജി ശർമ, സന്തോഷ് കീഴാറ്റൂർ, രഞ്ജിത്ത് കാങ്കോൽ, ജെയ്സ് ജോസ്, ജോസുകുട്ടി, ചൈതന്യ പ്രകാശ് തുടങ്ങി മലയാളത്തിലെ വമ്പൻ താരനിര അണിനിരക്കുന്ന ചിത്രത്തിന് മികച്ച ദൃശ്യാനുഭവം തന്നെ പ്രേഷകർക്ക് നൽകാൻ കഴിയുമെന്നതിൽ ഒരു സംശയവുമില്ല. ജേക്സ് ബിജോയ് സംഗീത സംവിധാനവും അജയ് ഡേവിഡ് കാച്ചപ്പിള്ളി ഛായാഗ്രഹണം നിർവഹിക്കുന്നു.
