ന്യൂഡൽഹി. സ്വാതന്ത്ര്യത്തിന്റെ 75-ാം വാർഷികാഘോഷങ്ങളുടെ ഭാഗമായി എന്റെ മണ്ണ് എന്റ ദേശം പരിപാടിയ്ക്ക് ഡൽഹിയിലെ കർത്തവ്യപഥിൽ തുടക്കമായി. പരിപാടിക്കായി രാജ്യത്തിന്റെ വിവിധ ഭാഗങ്ങളിൽ നിന്ന് മണ്ണ് അടങ്ങുന്ന അമൃത കലശങ്ങൾ ഡൽഹിയിലെത്തിച്ചു. ഓരോ ഭൂപ്രദേശങ്ങളിലെയും പ്രധാനപ്പെട്ട സാംസ്‌കാരിക പരിപാടികളോടെയാണ് കലശങ്ങൾ സമർപ്പിക്കുന്നത്.
സ്വാതന്ത്ര്യ സമരസേനാനികളുടേയും രാജ്യത്തിനായി ജീവ ത്യാഗം ചെയ്ത സൈനികരുടെ സ്മൃതി മണ്ഡപങ്ങളിൽ നിന്നും ചരിത്ര സ്മാരകങ്ങളിൽ നിന്നുമായി ശേഖരിച്ച മണ്ണ് ഉൾപ്പെടുന്ന 8500 ഓളം കലശങ്ങളാണ് കർത്തവ്യപഥിൽ എത്തുന്നത്.
നാളെ നടക്കുന്ന ‘മേരി മട്ടി മേരാ ദേശ്’ അമൃത് കലശ യാത്രയുടെ സമാപന പരിപാടിയിൽ പ്രധാനമന്ത്രി നരേന്ദ്രമോദി പങ്കെടുക്കും. പരിപാടിയുടെ ഭാഗമായി മേരാ യുവ ഭാരത് പോർട്ടലിന്റെ ഉദ്ഘാടനം പ്രധാനമന്ത്രി നരേന്ദ്രമോദി നിർവ്വഹിക്കും. ആസാദി കാ അമൃത് മഹോത്സവത്തിന്റെ സമാപന ചടങ്ങ് കൂടിയാണിത്.
