പായസത്തിലും കേക്കുകളിലും പലഹാരങ്ങളിലുമാണ് പൊതുവെ ഉണക്കമുന്തിരി ഉപയോഗിക്കാറുള്ളത്. പോഷകങ്ങളുടെ കലവറയാണ് ഉണക്കമുന്തിരി. ഇവ കുതിർത്തും അല്ലാതെയും കഴിക്കുന്നത് ആരോഗ്യത്തിന് വളരെയധികം നല്ലതാണ്. കുതിർത്ത് കഴിക്കുന്നതാണ് ഏറ്റവും നല്ലത്. പ്രകൃതിദത്തമായ ആന്റിഓക്‌സിഡന്റുകളാണ് ഇതിൽ അധികവും അടങ്ങിയിട്ടുള്ളത്.
ഇതിന് പുറമെ പതിനഞ്ചിലധികം വ്യത്യസ്ത വിറ്റാമിനുകളും ധാതുക്കളും ഉണക്കമുന്തിരിയിൽ അടങ്ങിയിട്ടുണ്ട്. മലബന്ധം ഉൾപ്പെടെയുള്ള പല ബുദ്ധിമുട്ടുകൾക്കും ഇതിലെ ഉയർന്ന അളവിലുള്ള നാരുകൾ സഹായകമാകും. പൊട്ടാസ്യം ധാരാളം ഇതിൽ അടങ്ങിയിട്ടുണ്ട്. കൂടാതെ ഉണക്കമുന്തിരിയിൽ അടങ്ങിയിരിക്കുന്ന കാത്സ്യം എല്ലുകളുടെ ആരോഗ്യം സംരക്ഷിക്കും.
ഉണക്കമുന്തിരി ശരീരത്തിലെ ധാതുക്കളുടെ ആഗിരണം വേഗത്തിലാക്കുന്നു. മുടിയ്‌ക്ക് ഏറെ പോഷണം നൽകി അകാല നരയും മുടി കൊഴിച്ചിലും പരിഹരിച്ച് തലമുടിയുടെ ആരോഗ്യം സംരക്ഷിക്കുന്നതിന് ഉണക്കമുന്തിരി നല്ലതാണ്. ഇതിൽ അടങ്ങിയിരിക്കുന്ന പൊട്ടാസ്യം രക്തത്തിലെ സോഡിയത്തിന്റെ അളവ് കുറയ്‌ക്കും. രക്തസമ്മർദം നിയന്ത്രിക്കുന്നതിനും വിളർച്ച ഇല്ലാതാക്കുന്നതിനും ഉണക്കമുന്തിരി ഉത്തമമാണ്. പ്രതിരോധശേഷി കൂട്ടുന്നതിനും ഉറക്ക പ്രശ്‌നങ്ങൾ പരിഹരിക്കുന്നതിനും ഉണക്കമുന്തിരി ദിവസവും കഴിക്കുന്നത് നല്ലതാണ്.
